Հայկական վերածնունդ կուսակցությունը (ՀՎԿ) առաջիկա խորհրդարանական ընտրություններին կմասնակցի միայնակ: Այսօր լրագրողների հետ հանդիպման ժամանակ նման հայտարարությամբ հանդես եկավ կուսակցության նախագահ Արթուր Բաղդասարյանը: ՀՎԿ-ում 300 հոգանոց ցուցակ են կազմել, առաջադրելու են 164 հոգի ռեյտինգային եւ 136 հոգի համամասնական ընտրակարգով:
Ցուցակի առաջին եռյակում են Արթուր Բաղդասարյանը, Մհեր Շահգելդյանը, Հեղինե Բիշարյանը, այնուհետեւ`Հովհաննես Մարգարյան, Իշխան Խաչատրյան, Էդգար Առաքելյան, Մարինե Քոչարյան եւ այլն:
Ռեյտինգային ընտրակարգով ՀՎԿ-ն Էրեբունիում կառաջադրի 13, Մալաթիայում, Նոր-Նորքում, Արաբկիրում 14-ական թեկնածուներ, Շիրակի, Արմավիրի, Լոռու մարզերում՝ 15-ական, Արարատի մարզում՝ 14, Սյունիքի մարզում՝ 10, Արագածոտնի եւ Տավուշի մարզերում՝ 7-ական, Գեղարքունիքում`12:
Քիչ հետո ցուցակներն արդեն կներկայացվեն ԿԸՀ:
Կարդացեք նաև
Երեւանում կունենան 13 շտաբ, դրանք կհամակարգի խորհուրդը, որի կազմում են Արթուր Բաղդասարյանը, Հեղինե Բիշարյանը, Էդգար Առաքելյանը, Կարեն Թումանյանը:
Նախընտրական դաշինքները, ըստ Արթուր Բաղդասարյանի, Հայաստանում հաջող փորձ չունեն. «Եղան դաշինքներ, որոնք դեռ չձեւավորված փլուզվեցին»: Հետընտրական շրջանում համագործակցությունը չեն բացառում ոչ մեկի հետ, այդ թվում նաեւ ՀՀԿ-ի: «Բայց առուն թռնենք նոր հոպ ասենք`ընտրությունները տեղի ունենան, արդյունքները ամրագրվեն»,- ասաց Արթուր Բաղդասարյանը` նկատելով, որ նոր Սահմանադրությամբ քաղաքական համախմբումները անխուսափելի են: Սակայն, հստակեցրեց`ՀՎԿ-ն չի լինի որեւէ կոալիցիայում, որտեղ չի ունենա որոշումներ վրա ազդեցություն: Քանի՞ տոկոս ձայն են ակնկալում հարցին՝ հնչեց այսպիսի պատասխան. «Ակնկալում են`ինչքան Աստված տվեց»: Մինչդեռ, ըստ կուսակցության նախագահի, իրենք չեն պայքարում ԱԺ մուտք գործելու համար, ավելի բարձր նշաձող են դրել:
ՀՎԿ-ի կարգախոսն առաջիկա ընտրություններում լինելու է. «Քվեարկիր հանուն փոփոխության, քվեարկիր հանուն վերածննդի»: Ըստ բանախոսի, Հայաստանում փոփոխությունները հասունացել են, հանրության 99 տոկոսը պահանջում է դրանք, Հայաստանի բոլոր ոլորտներում վերածնունդի անհրաժեշտություն կա:
Նախընտրական ծրագրի մասին մանրամասները կներկայացնեն առանձին`շնորհանդեսի շրջանակում:
Լրագրողները նկատեցին, որ ՀՎԿ համագումարում Արթուր Բաղդասարյանի`կաշին քերթելու եւ Հեղինե Բիշարյանի`աչքեր հանելու մասին հայտնի հայտարարությունները շատ շահարկվեցին սոցցանցերում, Արթուր Բաղդասարյանին անգամ «քերթողահայր» անվանեցին: Հարց հնչեց`ո՞նց եք պատրաստվում մարդկանց կաշիները քերթել, եթե ծախվեն տեղերը: «Ես իմ կուսակիցների հետ եմ խոսել, այդ դահլիճում ինձ հարազատ մարդիկ են եղել, որոնց 99 տոկոսի հետ ես ճանապարհ եմ անցել»,- ասաց Արթուր Բաղդասարյանը:
Այլ մանրամասները`տեսանյութում
Հեղինե Բիշարյանի հայտարարության մասին էլ ասաց. «Քանի որ նախօրեին եղել է այդ նախադասությունից ավելի շատ վատ նախադասություն, երեւի դրանով էր պայմանավորված տիկին Բիշարյանի էմոցիոնալ արձագանքը: Պետք չէ դրա մեջ ինչ-որ բան տեսնել: Դա ուղղված է եղել մեզ թաղելու եւ նման անբարո արտահայտություններ անողներին, ոչ թե ով մեր դեմ կխոսի»:
Նելլի ԳՐԻԳՈՐՅԱՆ
