2016թ. հուլիսի 20-ին զանգվածային անկարգությունների ընթացքում ոստիկանության աշխատակիցների նկատմամբ բռնություն իրականացնելու մեջ մեղադրվող Արարատ Խանդոյանի գործով դատական նիստն այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում տեղի չունեցավ: Դատական նիստը հետաձգվեց մեղադրյալի պաշտպանի բացակայության պատճառով, հաջորդ նիստը նշանակվեց ապրիլի տասներեքին:
Նախքան նիստերի դահլիճից հեռանալը՝ Արարատ Խանդոյանը նախագահող դատավոր Մնացական Մարտիրոսյանին հարց ուղղեց.
«Մի հատ բան եմ ուզում ճշտել, դատարանն արդարադատությո՞ւն է իրականացնելու, թե՞ պետպատվեր»:
Մնացական Մարտիրոսյանն էլ ի պատասխան ասաց, որ անիմաստ հարցերին չի պատասխանում:
Կարդացեք նաև
«Անիմաստ հարց չէ, սխալ տեղը հարց չեմ տալիս»,- հակադարձեց Խանդոյանը: Պարոն Մարտիրոսյանն էլ ասաց՝ դուրս եկեք, դուրս եկեք:
Հիշեցնենք, որ Արարատ Խանդոյանին մեղադրանք է առաջադրվել 2016թ. հուլիսի 20-ին Երևան քաղաքում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված զանգվածային անկարգությունների ընթացքում ոստիկանության աշխատակիցների նկատմամբ բռնություն գործադրելու համար: Ըստ մեղադրանքի, Արարատ Խանդոյանը ձեռքերով և ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել և փորձել է խլել ոստիկանության ծառայողի վահանը:
Արփինե ՍԻՄՈՆՅԱՆ
