Շենգավիթ վարչական շրջանի ընդհանուր իրավասության դատարանում այսօր «Ժիրայր Սեֆիլյանի եւ մյուսների» գործով դատական նիստը վերսկսվելուն պես դատավոր Տաթեւիկ Գրիգորյանն արձանագրեց, որ ամբաստանյալ Ներսես Պողոսյանի շահերի պաշտպան, փաստաբան Նինա Կարապետյանցը գտնվում է ապակե պատնեշից այս կողմ՝ քաղաքացիների համար նախատեսված սրահում:
Կարապետյանցը հայտարարեց, որ իրեն կարգադրիչները փորձել են խուզարկել, այդ պատճառով աշխատանքային գործիքներն ու փաստաթղթերը թողել է մեքենայում ու մուտք գործել անձնագրով՝ փաստաբանի վկայականի փոխարեն: Դատավորը նրան խնդրեց անցնել ապակե պատնեշից այս կողմ՝ հարցը պարզաբանելու:
-Դրանք իմ աշխատանքային պարագաներն են, բնականաբար, պայուսակում զենք ու զրահ չկա, արգելված իրար չկան: Առավել եւս, որ արգելված իրերի ցանկ էլ չկա, իսկ կարգադրիչն ասում է՝ «բացեք տեսնեմ»…Չի կարելի փաստաբանին նման պահանջ ներկայացնել, նրան խուզարկել չի կարելի,- ասաց պաշտպանը:
-Դուք կատարում եք գործողություններ, որոնք խափանում են դատական նիստը: Հետաձգում ենք, հանրային պաշտպանի հրավիրում,-չհամաձայնեց դատավորը:
-Մեղքը փաստաբանի վրա եք ուզում բարդել, մինչդեռ պետք է միջոցներ ձեռնարկեք, որպեսզի մեզ չխուզարկեն:
-Հիմա դատարանում չորս այլ պաշտպաններ են նստած, որոնք առանց խնդրի զննություն են անցել ու ներկայացել: Դուք տարբերակված մոտեցո՞ւմ եք ցուցաբերում:
-Դա կարգադրիչներին հարցրեք:
-Բողոքարկեք նրանց գործողությունները, բայց որպես պաշտպան պարտավոր եք ներկա լինել:
-Դուք պատկերացնո՞ւմ եք՝ քանի տարի կտեւի բողոքարկման գործընթացը եւ ինչ քաշքշուկ կլինի…
Ի վերջո, Նինա Կարապետյանցը հեռացավ նիստերի դահլիճից: Նիստն ընդմիջվեց, որպեսզի դատավորը նրա հանդեպ սանկցիա կիրառելու հարցը քննարկի: Նշենք, որ նույն խնդրով դատարան չէր մտել նաեւ ամբաստանյալների պաշտպաններից Արայիկ Պապիկյանը:
Ազատամարտիկ, «Հիմնադիր խորհրդարան» ընդդիմադիր շարժման անդամ Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ զավթելու փորձի մեջ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Լուիզա ՍՈՒՔԻԱՍՅԱՆ
