Շենգավիթ վարչական շրջանի ընդհանուր իրավասության դատարանում այսօր «Ժիրայր Սեֆիլյանի եւ մյուսների» գործով դատական նիստն է: Ամբաստանյալներ Ժիրայր Սեֆիլյանը, Հրայր Թոփչյանը, Սասունիկ Կիրակոսյանը, Գալուստ Գրիգորյանը, Ներսես Պողոսյանը եւ Գևորգ Սաֆարյանը որոշակի ժամանակահատվածով հեռացված են նիստերից՝ դատարանի հանդեպ անհարգալից վերաբերմունքի՝ դատավորին գալուն պես ոտքի չկանգնելու եւ տեղից խոսելու համար: Դահլիճ է բերվում միայն Սեֆիլյանի դեմ ցուցմունք տված անձը՝ ամբաստանյալ Հովհաննես Պետրոսյանը:
Ազատամարտիկ, «Հիմնադիր խորհրդարան» ընդդիմադիր շարժման անդամ Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ զավթելու փորձի մեջ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը:
Ժիրայր Սեֆիլյանի պաշտպան Արա Զաքարյանը գրություն էր ուղարկել դատավոր Տաթեւիկ Գրիգորյանին առ այն, որ նախապես նշանակված մեկ այլ նիստի է մասնակցում եւ խնդրում է սույն գործով նիստերը ուրբաթ օրերին չնշանակել: Դատավորը, սակայն, արձանագրեց, որ փաստաբանն իրավական օգնության պայմանագիր ստորագրելուց առաջ պետք է հաշվի առնի իր զբաղվածությունը, իսկ այս գործով նիստերը մշտապես ընթանալու են ուրբաթ օրերին:
Դատավորը նշեց, որ Զաքարյանն ընդհանուր առմամբ՝ երեք դատական նիստ է՝ չի ներկայացել, ուստի նիստերի դահլիճ բերվեց Ժիրայր Սեֆիլյանը՝ կարծիք արտահայտելու: «Իմ պաշտպանների ազգանունները Ձեզ լավ հայտնի են: Դուք միտումնավոր նրանց թույլ չեք տալիս ներկա լինել: Իմ բացակայության ժամանակ որեւէ պաշտպան իրավունք չունի այստեղ գտնվել»,- դատավորին ասաց Ժիրայր Սեֆիլյանը, այնուհետեւ ոստիկանները տարան նրան:
Նիստը դեռեւս անհասկանալի պատճառներով ընդմիջվեց: Հավանաբար, Տաթեւիկ Գրիգորյանը որոշում է կայացնելու Արա Զաքարյանին սանկցիայի ենթարկելու կամ Սեֆիլյանի համար հանրային պաշտպան ներգրավելու մասին:
Լուիզա ՍՈՒՔԻԱՍՅԱՆ
