Դարչինով խմորեղենները տարբեր ազգերի խոհանոցներում շատ սիրված եւ ընդունված տեսակներից են: Այսօր առաջարկում եմ ամերիկյան հայտնի դարչնաոլորի` cinnamon roll-երի բաղադրատոմսը` անչափ նրբահամ եւ բուրումնավետ թխվածք, որը կդառնա ձեր ընտանիքի սիրելի քաղցրավենիքներից մեկը:
Անհրաժեշտ մթերքները
Խմորի համար
Ալյուր-0,5 կգ
Աղ-0,5 թեյի գդալ
Չոր խմորիչ- 1 ոչ լիքը ճաշի գդալ
Ջուր-0.5 բաժակ
Կաթ- 1 բաժակ
Ձու- 2 հատ
Կարագ- 50 գրամ (1/4 տուփ)
Մեղր- 2 լիքը ճաշի գդալ
Լցոնի համար
Կարագ- 100 գրամ (կես տուփ)
Եղեգնաշաքար (շագանակագույն շաքարավազ)- 200 գրամ
Աղացած դարչին- 2 լիքը ճաշի գդալ
Ընկույզ- կես բաժակ (պարտադիր չէ)
Կրեմ-ջնարակի (глазурь) համար
Սերուցքային պանիր ( cream cheese)-100 գրամ
Շաքարի փոշի- 1 բաժակ
Կարագ-50 գրամ
Պատրաստման եղանակը
Սկզբում պատրաստում ենք խմորը: Ալյուրը մաղեք խորը թասի մեջ: Մի անկյունում լցրեք խմորիչը, մյուս կողմում` աղը: Խմորիչն ու աղը իրար ցանկալի է չհպվեն` չոր վիճակում, իրար հետ «լավ» չեն:
Կարագը հալեցրեք, լցրեք ջրի եւ կաթի խառնուրդի մեջ, ավելացրեք մեղրը եւ ողջ խառնուրդը գոլացրեք` մինչեւ 40-42 աստիճան:
Զգուշորեն ավելացրեք ալյուրին: Ավելացրեք նաեւ նախապես հարած ձվերը: Լավ խառնեք փայտի գդալով, ծածկեք մաքուր սրբիչով եւ դրեք հանգստանալու մոտ մեկ ժամ:
Մեկ ժամից, երբ խմորը որոշ չափով բարձրացած կլինի, նորից լավ խառնեք, ծածկեք եւ այս անգամ դրեք սառնարան` առնվազն 8 ժամով: Նկատենք, որ մինչեւ 2-3 օր կարող եք սառնարանում պահել: Սառնության մեջ խմորիչը շարունակում է իր գործն անել` ավելի երկար ժամանակով եւ ավելի լավ արդյունքով: Կարող եք նախորդ երեկոյան պատրաստել խմորը եւ առավոտյան սկսել թխելը` նախաճաշին բուրումնավետ դարչնաոլորներ մատուցելու համար:
8-10 ժամը լրանալուց հետո սառնարանից հանեք ձեր խմորը եւ լցրեք ալյուրապատ տախտակի վրա: Ի դեպ, մինչեւ սառնարան դնելը խմորը բավականին թույլ է լինում` գդալով խառնելու չափ: Սակայն սառելուց եւ առնվազն 2-3 անգամ «աճելուց» հետո` այն դառնում է բավականին հասուն եւ պինդ` գրտնակվելու պատրաստ խմոր:
Վրան նույնպես ալյուր ցանեք եւ գրտնակեք` մոտ 1 սմ հաստությամբ ուղղանկյուն խմոր:
Լցոնի համար նախատեսված կարագը հալեցրեք, վրան լցրեք շագանակագույն շաքարավազն ու դարչինը, լավ խառնեք: Լցոնը տարածեք խմորի ողջ մակերեսի վրա` եզրերից թողնելով 1սմ-ական տարածք, որպեսզի փաթաթելիս լցոնը դուրս չգա: Եթե ուզում եք ընկույզով ռոլլեր լինեն, կես բաժակ ընկույզը խոշոր կտրատեք եւ լցոնի վրա շաղ տվեք:
Սկսեք փաթաթել խմորը ռուլետաձեւ` զգուշությամբ եւ հավասար: Դառնում է մի մեծ գլանակ: Շատ սուր դանակով այդ գլանակը կտրատեք 2-3 սմ լայնությամբ կտորների: Խորը հրակայուն ամանի հատակին յուղաթուղթ փռեք եւ դարչնաոլորները տեղավորեք մեջը` միմյանցից որոշակի հեռավորության վրա, քանի որ հերթական հասունացումից հետո նրանք նորից մեծանալու են եւ հպվեն իրար: Ծածկեք սրբիչով եւ դրեք տաք տեղ` վերջնական հասունացման համար:
Մեկ-երկու ժամ անց կարող եք ձեր դարչնաոլորները դնել 180-190 աստիճան տաքացրած ջեռոցի մեջ: Եփվում է մոտ 35-45 րոպե` մինչեւ լավ ոսկեգունելը:
Այդ ընթացքում պատրաստեք ջնարակը: Սենյակային ջերմաստիճանի կարագը, սերուցքային պանիրն ու շաքարի փոշին խառնեք էլեկտրական հարիչով կամ փայտե գդալով, մինչեւ դառնա միատարր զանգված:
Կարող եք սերուցքային ջնարակի փոխարեն դարչնաոլորների վրա լցնել կարամելային թանձրուկ: Մեր սուպերմարկետներում վաճառվում են պատրաստի կարամելային թանձրուկներ:
Երբ դարչնաոլորները պատրաստ լինեն, հանեք ջեռոցից, թողեք 10 րոպե` գոլանա, ապա վրան լցրեք սերուցքային ջնարակը կամ կարամելային թանձրուկը: Կարող եք մատուցել միանգամից` գոլ վիճակում: Բարի վայելում:
Պատրաստեց Մելանյա ԲԱՐՍԵՂՅԱՆԸ
Հարգելի Մելանյա,
Բաղադրիչների ցանկում նշված է ջուր, տեքստում՛ կաթ, և՛ մեկն է պետք, և՛ մյուսը? Նաև ձվի մասին տեքստում գրված չէ։
Շատ շնորհակալություն դիտողության համար, հարգելի Աննա: Արդեն շտկեցի տեքստը` հարկավոր է ե’ւ կաթ, ե’ւ ջուր: