«Երկիր Ծիրանի» կուսակցության հիմնադիր-ղեկավար, նախկին պատգամավոր Զարուհի Փոստանջյանն այսօր շարունակում էր մարզային այցելությունները: Դիլիջանում «Իմ քայլը» շարժման աջակիցները, ինչպես ավելի վաղ կոչ էր արել շարժման առաջնորդ Նիկոլ Փաշինյանը, փակել էին ավտոճանապարհը: Զարուհի Փոստանջյանը մոտեցավ ցուցարարներին, որոնք վանկարկում էին՝ «ՀՀԿ՝ հեռացի՜ր»: Hraparak.am-ի ուղիղ եթերում Զարուհի Փոստանջյանը ցուցարարներին «համազգային մեծ ընդվզման մասնակիցներ» անվանեց, ապա ասաց. «Ամիսներ առաջ էլ էի Դիլիջանում: Այդ ժամանակ մարդիկ անտարբեր էին: Բայց այն, որ ասում էինք՝ պետք է համազգային ընդվզում լինի, այսօր դա իրականություն է»:
Զարուհի Փոստանջյանը տեղացիներին կոչ արեց արդեն իսկ պահանջներ ներկայացնել, խնդիրները բարձրաձայնել, քանի որ անձերի փոփոխություն կարող է լինել. «ՀՀԿ-ն քանդվել է, բայց «քամելեոն»-մարդիկ չեն փոխվել»: Ցուցարարները, սակայն, սկսեցին վանկարկել՝ «Զարուհի, հեռացի՜ր»: Երիտասարդներից մեկը բացատրեց՝ պատճառը նախկինում տիկին Փոստանջյանի կողմից Նիկոլ Փաշինյանի հասցեին հնչեցրած որակումներն են: «Լավ եմ արել, դա իմ իրավունքն է»,-ի պատասխան ասաց Զարուհի Փոստանջյանը:
Նրա կուսակիցներից Սոնա Աղեկյանը եւ Մարինա Խաչատրյանը ուսուցիչներից մեկին հիշեցրին ՀՀԿ-ականներին 10 000 դրամով ծախված եւ ՀՀԿ-ին օգնած ուսուցիչների մասին, ինչից հետո ցուցարարների հետ վեճեր սկսվեցին:
Ցուցարարները, այդ թվում՝ աշակերտներ, իրավիճակը հանդարտեցնելու նպատակով սկսեցին «Նիկոլ-Նիկոլ» վանկարկումներով դհոլ եւ կլառնետ նվագել, ծափ տալ, պարել, բղավել՝ «տաշի՜», «Զարուհի՝ հեռացիր»:
«Եթե ուզում եք, կխոսեմ, ես խոսքի եւ գործի մարդ եմ, ոչ թե՝ երգուպարի»,-համառեց Փոստանջյանը, սակայն ցուցարարները հրաժարվեցին բարձրախոս մոտեցնել: «Ճանապարհ տվեք, որ հեռանամ, երեխեք ջան»,-ժպտալով եզրափակեց Զարուհի Փոստանջյանը:
Լուիզա ՍՈՒՔԻԱՍՅԱՆ
Տիկ, Փոստանջեանին հետ արհամարհանքով վարուիլը ճիշդ չեմ գտներ – ան շատ արժանիքներ ունի և միշտ յաջող կերպով ներկայացուցած է ողջամիտ կանանց ձգտումները հանրութեան – Բայց կը կարծեմ որ այս հանգրուանին բոլորովին անտեղի է անձնական տեսակէտներու վրայ վէճ յարուցանել;Պէտք է իրեն տրուի սխալելու կարելիութիւնը – ՛՛ ով՞ չէ սխալած իր կեանքի ընթացքին թող առաջին քարը նետէ դիմացինին ՛՛–պիտի ըսէիր Յիսուս, եթէ ուզէր միջամտել մեր ճղճիմ հարցերուն;