Երեւանի Սուրեն Սպանդարյանի թիվ 24 հիմնական դպրոցում բունտ է հասունանում: Քաղաքապետարանից դպրոցի մանկավարժներին ու ծնողներին օրեր առաջ տեղեկացրել են, որ սեպտեմբերի մեկից Հակոբ Կոջոյանի անվան գեղարվեստի դպրոցի մոտ 500 աշակերտ մոտ երկու տարով տեղափոխվելու է Սպանդարյանի դպրոցում ուսանելու: Այս որոշման պատճառը Կոջոյանի անվան դպրոցի վթարային լինելն է, այս դպրոցում վերանորոգման աշխատանքներ են սկսվելու, իսկ Սպանդարյանի անվան դպրոցը նախատեսված է 600 աշակերտի համար:
«Կոջոյանի անվան դպրոցի աշակերտներին տեղափոխելու են մեր դպրոցի տարրական դասարանների մասնաշենք, իսկ տարրական դասարանների աշակերտները պետք է տեղափոխվեն մեծերի մասնաշենք: Մեր դպրոցը դառնում է եռահերթ, այսինքն, աշակերտները կսովորեն երեք հերթով: Մեր դպրոցում սովորում է 530 աշակերտ, իսկ ըստ լիցենզիայի՝ այն 600 աշակերտի համար է նախատեսված»,- Aravot.am-ին ահազանգեցին Սպանդարյանի անվան դպրոցի մանկավարժները:
Նախօրեին քաղաքապետարանի աշխատակցի հետ հանդիպման ժամանակ Սպանդարյանի անվան դպրոցի մանկավարժները երկու դպրոցի ժամանակավոր մեկ հարկի տակ գործելու խնդրի վերաբերյալ հարցեր են բարձրացրել, մասնավորապես՝ ինչպես է դպրոցը գործելու եռահերթ, հաշվի առնվել է արդյոք թե աշխատող ծնողն ինչ է անելու տարբեր հերթերում սովորող իր երեխաներին կամ հաշվի առնվել է արդյոք, որ այդ որոշման արդյունքում տուժելու է ուսումը, ինչպես է հնարավոր, որ առաջին դասարանցին օգտվի իններորդ դասարանցու հետ նույն զուգարանից, եթե մեծերի մասնաշենքում ընդամենը երկու զուգարան կա: Մանկավարժները այդ հանդիպման ժամանակ մտահոգություն են նաեւ հայտնել, որ քաղաքապետարանի որոշման արդյունքում Սպանդարյանի անվան դպրոցի աշակերտների թիվը կնվազի եռահերթ լինելու պատճառով, քաղաքապետարանի աշխատակիցն էլ ի պատասխան ասել է, թե դա իրենք նկատի ունեցել են:
Ուսուցիչները նաեւ դժգոհում են, որ ստիպված են լինելու եռահերթ աշխատել նույն աշխատավարձով, ժամերը կավելանան, աշխատավարձը՝ ոչ:
Կարդացեք նաև
«Եթե ուսուցիչը երեք ժամ առաջին հերթից դասաժամ ունի, երկու ժամ երրորդ հերթից, ով է վճարելու դրա համար, օրինակ ես աշխատում եմ առավոտյան 8-15-ից մինչեւ 2:15 ու վճարվում եմ այդ ժամանակահատվածի համար»,- դժգոհեցին ուսուցիչները:
Սպանդարյանի անվան դպրոցի տնօրինությանը նաեւ հայտնել են, որ Կոջոյանի անվան դպրոցից գալու են ոչ միայն աշխատակազմով ու աշակերտներով, այլեւ գույքով, այնպես որ Սպանդարյանի անվան դպրոցը պետք է իր գույքը հանի նրանց տրամադրվող մասնաշենքից, իսկ Սպանդարյանի անվան դպրոցի մանկավարժները մտահոգվել են՝ ուր տանեն իրենց դպրոցի գույքը, իրենց աշխատավարձով գնված գրատախտակները եւ այլն: Aravot.am-ը ԿԳՆ-ից տեղեկացավ, որ Կոջոյանի անվան դպրոցի վերանորոգման ժամկետը դեռ հստակեցված չէ, իսկ տեղափոխման հարցը դեռ հայտնի չէ: Երեւանի քաղաքապետարանից խոստացան խնդրի վերաբերյալ պարզաբանում տալ ավելի ուշ:
Արփինե ՍԻՄՈՆՅԱՆ
