Վերջին օրերին՝ հուլիսի 17-ից սկսած, Էջմիածնի մի շարք թաղամասերում ժամը 00:04-00:07-ն ընկած ժամանակահատվածում կրակելով սպանել են 7-8 անտուն շների: Այս մասին Aravot.am-ի «ԿԵՆԴԱՆԱՊԱՏՈՒՄ» նախագծին հայտնեց «Դինգո թիմ» կենդանիների իրավունքների պաշտպանության հ/կ-ի համակարգող Գոհար Մանուշակյանը: «Շների կազմակերպված սպանդ է տեղի ունեցել՝ բնակելի վայրերում: Կենդանիների դիերի վրա կան հրազենի հետքեր: Մեկ շուն է միայն ողջ մնացել, որը կլինիկայում գտնվում է բուժման մեջ: Կրակողները, միանշանակ, եղել են որսորդներ, որովհետեւ կենդանիներին կրակել են որսորդական զենքերից: Մի դեպքում բնակիչները տեսել են առանց համարանիշի արծաթագույն «Մերսեդես», որից կրակել են, մի դեպքում էլ բնակիչը ճանաչել է կրակողին, բայց վախեցել է անուն տալ»,-տեղեկացրեց Գոհար Մանուշակյանը:
Նրա փոխանցմամբ՝ մինչեւ Էջմիածնի նոր քաղաքապետ Դիանա Գասպարյանի ընտրությունը շներին ամեն օր կրակելով սպանել են. «Նոր քաղաքապետի օրոք սա նման առաջին դեպքն է, որովհետեւ փետրվարից Էջմիածնի քաղաքապետարանն ու Երեւանի անասնաբուժական կլինիկաներից մեկը համատեղ իրականացրել են շների ստերջացման ծրագիր: Ի դեպ, կրակված շների մի մասը ստերջացված է եղել: Քաղաքապետարանը կատարվածի մասին մեր միջոցով է տեղեկացել: Իրենք էլ են հաղորդում տվել ոստիկանությանը»:
Հավելենք, որ կատարվածի առնչությամբ այսօր գրառում է կատարել Էջմիածնի քաղաքապետ Դիանա Գասպարյանը. «Արդեն երկրորդ օրն է՝ համացանցում մեծ աղմուկ է մեր քաղաքում անտուն շների գնդակահարման շուրջ: Ցանկանում եմ տեղեկացել, որ երեկվանից ակտիվ կապի մեջ եմ ոստիկանության հետ, ստացել եմ հավաստիացումներ, որ կարվի ամեն ինչ՝ բոլոր մեղավորներին բացահայտելու համար: Ցավով տեղեկացա, որ սպանդի զոհ են դարձել նաև քաղաքապետարանի ծրագրով ստերջացված շները, որոնք բոլորովին անվնաս են և երբևէ չեն հարձակվում բնակիչների վրա: Հուսով եմ, որ կարճ ժամանակում մեղավորները կհայտնաբերվեն, և նոր դեպքերը կկանխվեն»:
Կարդացեք նաև
Լուիզա ՍՈՒՔԻԱՍՅԱՆ
Լուսանկարները՝ «Դինգո թիմ»-ի եւ Էջմիածնի բնակիչների
