Այսօր ԱԺ ճեպազրույցների ժամանակ լրագրողները ԲՀԿ պատգամավորներից հետաքրքրվեցին՝ Անժելա Թովմասյանի «Հայելու առաջ» հաղորդումը ինչո՞ւ փակվեց Ծառուկյանին պատկանող «Կենտրոն» հեռուստաընկերությունում:
Իվետա Տոնոյանը պատասխանեց, որ իրենք «Կենտրոնի» հետ հիմա որեւէ առնչություն չունեն. «Ես երկար տարիներ ղեկավարել եմ «Կենտրոն» ՀԸ-ի լրատվական ծառայությունը, սակայն այլեւս որեւէ առնչություն չունեմ: Ձեր հարցը ճիշտ կլինի ուղղել «Կենտրոն» ՀԸ-ի պատասխանատուներին: Գագիկ Ծառուկյանը «Մուլտի գրուպ» կոնցեռնի հիմնադիրն է, «Կենտրոն» ՀԸ-ն կուսակցական պատկանելություն չունի»:
Նա նաեւ ասաց. «Ծանոթացել եմ մեկնաբանություններին, տնօրենը հիմնավորել էր եթերային ցանցի փոփոխմամբ»: Նա ասաց, որ երկար տարիներ «Հայելու առաջը» կենդանի օրգանիզմ է, որեւէ այլ ենթատեքստ խնդրում են այս հարցին չհաղորդել, Անժելա Թովմասյանը իր դիրքորոշումը շատ պարզ արտահայտել է»:
Խոսելով Արսեն Բաբայանի կալանավորման մասին՝ ԲՀԿ խմբակցության քարտուղար Արման Աբովյանն ասաց, որ գործընթացը նոր է սկսվել, քաղաքական գնահատական չեն ուզում արտահայտել, կսպասեն, թե ինչպես կգնա իրավական գործընթացը:
Կարդացեք նաև
Ինչ վերաբերում է ԱԺ նախկին նախագահ Արա Բաբլոյանին, Իվետա Տոնոյանն ասաց. «Հանրության մեջ կա արմատացած կարծիք, որ այս գործընթացները քաղաքական ենթատեքստ ունեն, սրա մեջ կա որոշակի օբյեկտիվ հատիկ, որովհետեւ որոշ հայտարարություններ, որ հնչում են իշխանության այս կամ այն ներկայացուցիչների կողմից, այս հարցը տեղափոխել են այնպես, որ ՍԴ-ի հետ կապված հարցն այլեւս քաղաքական է եւ դրա հետ առնչություն ունեցող ցանկացած տեսակի զարգացումը, որքան էլ լինի իրավական, տեղավորվում է քաղաքական հարթության մեջ: Հուսով ենք որեւէ անօրինական գործընթաց տեղի չի ունենա որեւէ դեպքում»:
Հռիփսիմե ՋԵԲԵՋՅԱՆ
