Դավիթ Սանասարյանը պաշտոնում առայժմ չվերականգնվեց. ի՞նչ պատճառաբանեց դատարանը

Հեմոդիալիզի գնումների գործով պաշտոնեական լիազորությունների չարաշահման համար մեղադրվող Դավիթ Սանասարյանի գործով առաջին դատական նիստում այսօր նրա պաշտպանները դատարանին միջնորդեցին վերացնել հարկադրանքի միջոցը, որը հանգեցրել է նրա՝ ՀՀ Պետական վերահսկողական ծառայության պետի լիազորությունները դադարեցնելուն: Մեղադրող դատախազ Գեւորգ Սարգսյանը գտավ, որ միջնորդությունը ենթակա է մերժման. «Պաշտոնով պայմանավորված՝ նա ունի որոշակի ազդեցություն»:

Ըստ դատախազի՝ Սանասարյանի կողմից գործի նյութերն ու առարկաները կեղծելու կամ թաքցնելու հավանականություն է առկա:

Դատավոր Դավիթ Բալայանը որոշեց միջնորդությունը մերժել. «Դատախազի պատճառաբանությունների չնչին մասը դատարանի համար ընդունելի են: Այստեղ ավելի մեծ խնդիր կա. եթե դատարանը բավարարի, կանխակալ վերաբերմունք կդրսեւորի գործի քննության նկատմամբ: Կստացվի, որ մենք ասում ենք՝ «Սանասարյան, գնա աշխատի, որովհետեւ դատարանը քեզ մեղսագրվողը արժանահավատ չի համարում»: Դատարանը չէ Սանասարյանին աշխատանքի ընդունողն ու ազատողը»:
Դավիթ Սանասարյանը չհամաձայնեց. «Ոստիկանության ուղեկցող գումարտակի հրամանատարը, որը քրեական գործով է անցնում, շարունակում է աշխատել»:

Դատավոր Բալայանն իր հերթին հակադարձեց. «Բայց այդ գործի դեպքում լիազորությունների դադարեցման տեսքով հարկադրանքի միջոց կիրառված չէ»:

Ապա Սանասարյանի պաշտպաններից Ինեսա Պետրոսյանը միջնորդեց քրեական գործի վարույթը կասեցնել՝ վիճարկելով վարույթը նախաձեռնած մարմնի՝ ԱԱԾ քննչական դեպարտամենտի սահմանադրականության հարցը:

Դատարանը որոշումը կհրապարակի նոյեմբերի 27-ին, 13:30-ին:

Լուիզա ՍՈՒՔԻԱՍՅԱՆ