Այսօր Երեւանի ընդհանուր իրավասության դատարանի Շենգավիթի նստավայրում Թագուհի Մանսուրյանին եւ նրա ընտանիքին կացնահարած Վլադիկ Մարտիրոսյանի գործով դատական նիստն էր:
2016 թվականի հուլիսի 8-ին Երեւանի Սողոմոն Տարոնցի նրբանցքի 7-րդ շենքի շքամուտքի աստիճանների վրա տեղի ունեցած վիճաբանության ժամանակ Վլադիկ Մարտիրոսյանը կացնով բազմաթիվ հարվածներ էր հասցրել Կարինե, Թագուհի եւ Վաչագան Մանսուրյաններին: Այդ հարվածների հետեւանքով Թագուհու մայրը՝ Կարինե Մանսուրյանը մահացել էր, իսկ հայրն ու դուստրը՝ Թագուհին եւ Վաչագանը ծանր մարմնական վնասվածքներով տեղափոխվել էին հիվանդանոց:
Մոտ 4 տարի տեւած դատական նիստերից հետո, ակնկալվում էր, որ այսօր դատարանը վճիռ կկայացնի, սակայն այն հետաձգվեց, պաշտպանական կողմը ճառով հանդես չեկավ, պատրաստ չէր, միջնորդեց նիստը հետաձգել: Դատարանը հաջորդ նիստի օր նշանակեց ապրիլի 3-ին, ժամը 16:00-ին:
Դատարանում Թագուհի Մանսուրյանի շահերի պաշտպան Ինեսսա Պետրոսյանն իր ճառում ներկայացրեց Մարտիրոսյանի արարքի ամբողջ պատմությունը, դրան նախորդած իրավիճակը, թե ինչպես էր ամբաստանյալը մինչ կացնահարումը սպառնացել, բռնության ենթարկել, ինչպես է Թագուհի Մանսուրյանը պարբերաբար դիմել իրավապահ մարմիններին, սակայն պատշաճ աջակցություն չի ստացել: Փաստաբանն ասաց. «Գործով 8 դրվագ է եղել՝ խոշտանգում, ծեծ, սպանություն, սպառնալիք եւ այլն: Ոստիկանությունն էլ պատշաճ չի կատարել իր պարտականությունները, եւ հանցավոր մղումներ ունեցող Մարտիրոսյանին 08.07.2016-ին թողել է դեպքի վայրում, չի տարել ոստիկանության բաժանմունք, վերջինիս հնարավորություն տալով գնալ, վերցնել կացինն ու կատարել այդ հրեշավոր արարքը»:
Կարդացեք նաև
Պետրոսյանը նաեւ ասաց, որ ամբաստանյալի այն պնդումները, թե՝ Մանսուրյաններն իրեն զրկել են իր երեխայի հետ տեսակցությունից, դրա համար է նման քայլի դիմել, իրականությանը չեն համապատասխանում, ողջամիտ չեն, Մարտիրոսյանը է երեխայի մասին բացարձակ չի մտածել, քանի որ, ըստ պաշտպանի, նա նախապես ծրագրել էր երեքի սպանությունը. «Ամբաստանյալը պետք է ամենախիստ պատժի ենթարկվի»:
Մեղադրող կողմը դատարանից պահանջում է Վլադիկ Մարտիրոսյանին դատապարտել 18 տարվա ազատազրկման:
Վաչագան Մանսուրյանն էլ դատական նիստին պատմեց. «Արնաշաղաղ վիճակում զանգել եմ ոստիկանություն: Եկան, ասացի՝ է՞ս էիք ուզում: Էդ ժամանակ, որ կացնահարում էր, երեխան տեսնում էր, ու գոռում՝ մամա, մամա: Երեխայի աչքի առաջ ինձ էր կացնահարում: Մինչեւ հիմա երեխայի մոտ վախ կա, մի քանի օր առաջ տեղից վեր թռավ ու ասաց՝ մամա ջան, ես չեմ ուզում քեզ կորցնել»:
Թագուհի Մանսուրյանն էլ իր ելույթում ասաց. «Վլադիկ Մարտիրոսյանը սպառնացել էր ինձ, որ երեխան 2 տարեկանը չի բոլորի: Հանցանքի ժամանակ երեխաս 1 տարեկան 8 ամսական էր»:
Ապա` Մանսուրյանը պատմեց, թե ինչպես է ամբաստանյալը շքամուտքում սպասել ու հարձակվել իր ու մոր վրա. «Ես պահանջում եմ ամենախիստ պատիժը, նա խլել է իմ ծնողի կյանքը, ուզում եմ նրան ցմահ դատապարտեք, որ իմ երեխային չխանգարի, որ երեխաս մեծանա, ու իր նպատակին հասցնեմ»:
Դատավոր Դավիթ Բալայանը նիստի ավարտին հայտարարեց՝ հաջորդ դատական նիստին կլսի պաշտպանական կողմի ճառը, ռեպլիկներն ու կանցնի խորհրդակցական սենյակ՝ վճիռ կայացնելու:
Նելլի ԲԱԲԱՅԱՆ
