Մոսկվայում դատարանը մեղավոր է ճանաչել «Ռոսգոստրախ» ապահովագրական ընկերության նախկին համասեփականատեր Սերգեյ Խաչատուրովին՝ խարդախության և փողերի լվացման գործով, ինչպես նաև ավելի քան 2 միլիարդ ռուբլի յուրացնելու համար: Ինչպես հաղորդում է ՏԱՍՍ գործակալությունը, Խաչատուրովին օգնել է «Ռոսգոստրախբանկ»-ի նախկին բաժնետեր Նադեժդա Կլեպալսկայան:
Դատավճռի համաձայն՝ Խաչատուրով՝ Կլեպալսկայայի միջնորդությամբ, օգտվելով իր ծառայողական դիրքից, իրականացրել է առանձնապես խոշոր չափի յուրացում և վատնում: Գործում ներգրավված անձանց պատիժն առայժմ հայտնի չէ: Մեղադրող կողմը Խաչատուրովի համար պահանջել է 9 տարի, իսկ Կլեպալսկայայի համար՝ 8 տարի ազատազրկում:
Սերգեյ Խաչատուրովը և Նադեժդա Կլեպալսկայան ձերբակալվել էին 2018թ. գարնանը: Հետաքննությունը պարզել է, որ Խաչատուրովը յուրացրել և վատնել է իր իսկ արժեթղթերը, իսկ 2017թ. ստեղծել է հանցավոր խմբավորում, որին անդամակցել է նաև Կլեպալսկայան:
Պատրաստեց՝ Վիկտորյա ԱՆԴՐԵԱՍՅԱՆԸ
