Գնահատման ու թեստավորման կենտրոնից ստացված տվյալների համաձայն՝ 2020 թվականի ընդունելության միասնական քննություններին հայտագրվել է 11979 դիմորդ: Միասնական քննություններին մասնակցել է 11648 դիմորդ: Դրական գնահատական ստացել է 9372 դիմորդ, որում ներառված չեն ռազմական եւ գերատեսչական բուհերի ուսանողները եւ որից բարձրագույն ուսումնական հաստատություններ հիմնական փուլով ընդունվել է 8706 դիմորդ:
Այսօր այսպիսի տվյալներ իր ֆեյսբուքյան էջի ուղիղ եթերով հայտնեց ԿԳՄՍ նախարար Արայիկ Հարությունյանը՝ նշելով, որ երեկ լրացուցիչ փուլով ավարտվել է թափուր տեղերի մրցույթը: Ըստ նախարարի, թափուր տեղերի համար հայտարարված մրցույթի արդյունքով ընդունվել է 472 դիմորդ, չի ընդունվել 49-ը:
«Արդյունքում՝ դրական գնահատական ստացած ու բարձրագույն ուսումնական հաստատություններ միասնական քննությունների արդյունքում չընդունված դիմորդների թիվը 223 է, որոնք հնարավորություն ունեն սեպտեմբերին հեռակա ընդունելության ժամանակ պահպանելով իրենց գնահատականները՝ դիմել բուհեր: Այն համակարգը, որ մշակում ենք, որը շատ քիչ հնարավորություն է տալիս, որ իրենք կարող են չընդունվել, ըստ էության հեռակայով այս ընդունելությունը կկազմակերպվի»,-ասաց պարոն Հարությունյանը:
Նրա խոսքով, ընթացքում քննարկվել է աղմուկ հանած ընդունելության քննությունների հարցը. «Քննարկեցինք, որ 18 եւ ավելի գնահատական են ստացել, չեն ընդունվել: Այստեղ էլ լուծում ենք գտել: Տեղեկացնում եմ, որ այս տարի միասնական քննության արդյունքում գերազանց՝ 18 եւ ավելի միավոր ստացած, բայց բուհ չընդունված 6 դիմորդի առաջարկվել է իրենց դիմում-հայտերի հաջորդ կրթական ծրագրերին համապատասխան լուծումներ, եւ վեցից արձագանքել է 4 դիմորդ»: Արայիկ Հարությունյանն ասաց, որ իրականությանը չեն համապատասխանում այն դժգոհությունները, որ նոր կարգի մասին պատշաճ իրազեկում չի եղել: Նախարարը ուղիղ եթերի ընթացքում միացրեց ապրիլին հրապարակված իր ելույթը, որտեղ բացատրում էր նոր կարգը:
Կարդացեք նաև
Լուսինե ԲՈՒԴԱՂՅԱՆ
