Մի շարք քաղաքացիներ հինգշաբթի՝ օգոստոսի 20-ին, Ջերմուկից ավտոերթով շարժվել են դեպի Երևան՝ ի պաշտպանություն Ամուլսարի։ Իսկ Երևանում Հայկական բնապահպանական ճակատի անդամները սպասում էին նրանց Արամ Խաչատրյանի արձանի հարակից տարածքում։
Հայկական բնապահպանական ճակատ քաղաքացիական նախաձեռնության անդամ Լևոն Գալստյանն ասաց, որ ջերմուկցիները բոլոր իրավական հիմքերն ունեն իրենց իրավունքները վերականգնելու․ «Ջերմուկ քաղաքից պարզ երևում է այդ ամբողջ տարածքը, որտեղ որ գործողություններն են իրականացվում։ Բայց Ջերմուկ քաղաքի բնակիչների կարծիքը ոչ ոք չի հարցրել, դրա փոխարեն քննարկվել է ծրագիրը սարի մյուս կողմում գտնվող գյուղերում, որտեղից տարածքն ընդհանրապես չի երևում։ Եվ այդ գյուղերում ստացած համաձայնության որոշել են, որ Ջերմուկի մոտ՝ 7-8 կմ հեռավորության վրա այդպիսի գործունեություն իրականացնել։ Եվ փաստորեն, 70 տարի շարունակ լուրջ առողջարանային քաղաք և համաշխարհային բրենդ դարձած միջավայրը վերածել ինչ-որ 10 տարվա եկամուտների համար։ Սա է խնդիրը, և ջերմուկցիները վերականգնում են իրենց խախտված իրավունքները, մյուս քաղաքացիներն էլ իրենց ունեցած հնարավորությունների և ուժերի չափով սատարում են, աջակցում են և օգնում են նրանց»։
Ցուցարարները պահանջում են ուժը կորցրած ճանաչել նախորդ կառավարության՝ 2016 թվականին տված փորձաքննական դրական եզրակացությունը։
Կարդացեք նաև
Հայկական բնապահպանական ճակատի անդամներին միացան Ջերմուկի բնակիչները, նրանք երթով շարժվում են դեպի կառավարության շենք։
Ամի ՉԻՉԱԿՅԱՆ
