Հունաստանում քիչ հավանական է, որ որեւէ անկյուն գտնեք, որտեղ «բուգացա» չլինի: Թեեւ ամեն տարածաշրջան ունի բուգացայի պատրաստման իր եղանակը եւ անգամ անվանումը երբեմն տարբեր է լինում, սակայն հիմնական գաղափարը նույնն է՝ ֆիլո խմոր, որի մեջ սպիտակաձավարով եփված կրեմ է:
Այս տարբերակը, որն առաջարկում եմ, առավել հատուկ է Սալոնիկին եւ Հալկիդիկիին:
Անհրաժեշտ մթերքները
Ֆիլո խմոր- 1 տուփ, 10-14 շերտ
Կարդացեք նաև
Կարագ-200 գրամ
Կաթ-1 լիտր
Ձու-4 հատ
Սպիտակաձավար- 150 գրամ
Շաքարավազ-200 գրամ
Վանիլի մզվածք- 1 ճաշի գդալ, որը կարող եք փոխարինել 1 թեյի գդալ վանիլի շաքարով կամ մեկ պտղունց վանիլինով
Պատրաստման եղանակը
Ֆիլո խմորները վաճառվում են սառեցված վիճակում: Հարկավոր է նախ ապասառեցնել խմորը առնվազն 10 ժամ առաջ սառցախցիկից հանեք, դրեք սառնարան, որ «հետ գա»: Դա կարող եք անել բուգացայի պատրաստման նախորդ օրը:
Բուգացայի պատրաստումը սկսում ենք կրեմից:
Կարագի կեսը՝ 100 գրամը, հալեցրեք, ավելացրեք սպիտակաձավարը եւ շատ ցածր կրակի վրա սկսեք խառնել, մինչեւ սպիտակաձավարն ամբողջությամբ կլանի կարագը, ապա քիչ-քիչ ավելացրեք տաք կաթը: Ավելացնում եք կես բաժակի չափ, լավ խառնում, ապա հաջորդ կես բաժակը, ապա հաջորդը… այդպես, մինչեւ ամբողջ կաթը լցնեք: Ավելացրեք նաեւ շաքարավազը եւ վանիլը:
Առանձին ամանի մեջ լավ խառնեք չորս հատ ձուն, կաթնային խառնուրդից մեկ-երկու գդալ ավելացրեք ձվին, լավ խառնեք, ավելացրեք եւս մի քանի գդալ, լավ խառնեք, որպեսզի ձվի եւ կաթնային խառնուրդի ջերմաստիճանը շատ չտարբերվի, ապա ձուն լցրեք կաթնային խառնուրդի կաթսայի մեջ եւ կրկին դրեք կրակին:
Անընդհատ խառնելով մարմանդ կրակի վրա եփեք այնքան, մինչեւ լավ պնդանա, մոտ 10 րոպե: Լցրեք խորը ամանի մեջ, վրան ծածկեք սննդային թաղանթով եւ դրեք հով տեղ, որ սառչի:
Երբ բավականին գոլացած կլինի կրեմը, անցեք խմորին: Նախ միացրեք ջեռոցը 200 աստիճան, թողեք տաքանա:
Մնացած 100 գրամ կարագը հալեցրեք:
Ջեռոցի խորը թավայի հատակը յուղոտեք, վրան դրեք առաջին շերտ ֆիլոն, վրան ցողեք հալեցրած կարագից, դրեք երկրորդ շերտը, էլի կարագ… այսպես 5-7 շերտ: Որից հետո լցրեք կրեմը, հարթեցրեք:
Ապա կրկին շերտ առ շերտ կարագոտելով՝ շարեք ֆիլոյի մնացած թերթերը: Վերջին շերտը դնելուց եւ կարագոտելուց հետո, սուր դանակով մասնատեք խմորը չափաբաժինների եւ դրեք ջեռոցը:
Հարկավոր է մոտավորապես 45-60 րոպե, մինչեւ ամբողջությամբ կեփվի խմորեղենը:
Հանեք, թողեք հովանա, վրան շաքարի փոշի ցանեք եւ մատուցեք գոլ վիճակում:
Բարի ախորժակ:
Մանրամասները դիտեք տեսանյութում:
Պատրաստեց Մելանյա ԲԱՐՍԵՂՅԱՆԸ
