Aravot.am-ը Շիրակի մարզի դատախազ Գուրգեն Գրիգորյանին հարցրեց, թե 2021 թվականին թմրանյութերի ապօրինի շրջանառության ի՞նչ դեպքեր են արձանագրվել և ի՞նչ թմրանյութեր են շրջանառվում Շիրակի մարզում։
«2021 թվականի ընթացքում արձանագրվել են թմրամիջոցների հետ կապված թվով 72 գրանցված հանցագործություններ՝ նախորդ տարի գրանցված 64 հանցագործությունների փոխարեն, այսինքն՝ գրանցված հանցագործությունները աճել են 8 դեպքերով, կամ 12.5%-ով։
Թմրամիջոցների հետ կապված գրանցված հանցագործությունների աճը հիմնականում ապահովել է շրջանառությունն արգելված թմրամիջոցներ պարունակող բույսեր ցանելու կամ աճեցնելու դեպքերը, մասնավորապես՝ «Կանեփ»:
Կարդացեք նաև
Հաշվետու ժամանակահատվածում արձանագրվել է թմրամիջոցների ապօրինի շրջանառության 53 դեպք, նախորդ տարվա 57 դեպքի փոխարեն: Այսինքն՝ դեպքերը նվազել են 4-ով կամ 7.0%-ով։
Այս նվազմանը զուգահեռ աճել է բացահայտման ցուցանիշը: Մասնավորապես նույն ժամանակահատվածում վարույթներում գտնվող այս բնույթի քրեական գործերով և նյութերով հանցագործությունների բացահայտումը կազմել է 63.2 %, նախորդ տարվա 56.2%-ի դիմաց:
Շիրակի մարզում հիմնականում շրջանառվում են «Մարիխուանա», «Հաշիշի յուղ», «aPVP» տեսակների թմրամիջոցներ, սակայն ճնշող մեծամասնությունը «Մարիխուանա» տեսակի թմրամիջոցն է»,-տեղեկացրեց դատախազը:
Նունե ԱՐԵՎՇԱՏՅԱՆ
