Ռուսական ուժերի վերահսկողության տակ անցած ուկրաինական Խերսոնի մարզի «նոր իշխանությունները» հայտարարել են, որ պատրաստվում են դիմել Ռուսաստանի նախագահ Վլադիմիր Պուտինին՝ շրջանը Ռուսաստանին միացնելու խնդրանքով: Այս մասին հայտնում է «ՌԻԱ Նովոստին»:
Գործակալությունը մեջբերում է ակտիվիստ Կիրիլ Ստրեմոուսովի խոսքերը, որը հիշատակվում է որպես շրջանի նոր «ռազմաքաղաքական վարչակազմի» ղեկավարի տեղակալ:
«Խերսոնի մարզում ոչ մի Խերսոնի Ժողովրդավարական Հանրապետություն չի ստեղծվի, որևէ հանրաքվե չի լինի: Կլինի միասնական հրաման՝ հիմնված Խերսոնի շրջանի ղեկավարության կողմից Ռուսաստանի Դաշնության նախագահին ուղղված ուղերձի վրա, և կլինի խնդրանք՝ մարզը մտցնել Ռուսաստանի Դաշնության լիարժեք կազմի մեջ»,- ասել է Ստրեմոուսովը:
Ի պատասխան այդ հայտարարության՝ Կրեմլի պաշտոնական ներկայացուցիչ Դմիտրի Պեսկովն ասել է, որ «իրենց ճակատագիրը պետք է որոշեն Խերսոնի մարզի բնակիչները», և որ այդ հարցը պետք է հստակ և մանրամասն ուսումնասիրվի իրավաբանների կողմից, քանի որ «նման ճակատագրական որոշումները պետք է… լինեն բացարձակապես օրինական, ինչպես որ Ղրիմի դեպքում էր»:
Կարդացեք նաև
Խերսոնում նոր «ռազմաքաղաքական վարչակազմի» ստեղծման մասին պետական լրատվամիջոցները հայտնել էին դեռ ապրիլի վերջին: Արդյոք այն որևէ գործունեություն իրականացնո՞ւմ է մարզի կառավարման գործընթացում՝ հայտնի չէ:
«Նոր վարչակազմը» ղեկավարում է Խերսոնի նախկին քաղաքապետ Վլադիմիր Սալդոն: Նրա տեղակալ Կիրիլ Ստրեմոուսովը պարբերաբար հայտարարություններ է անում մարզը Ռուսաստանին միացնելու վերաբերյալ:
Փետրվարի 24-ին, հայտարարելով Ուկրաինայում այսպես կոչված «հատուկ ռազմական գործողության» մասին, Ռուսաստանի նախագահ Վլադիմիր Պուտինը հավաստիացնում էր, որ Ռուսաստանի ծրագրերում չկա «ուկրաինական տարածքների օկուպացիա»:
Ուկրաինայի նախագահ Վլադիմիր Զելենսկին նախկինում ասել է, որ եթե ուկրաինական շրջաններում որևէ «հանրաքվե» անցկացվի Ուկրաինայից անջատվելու վերաբերյալ, իրենք դուրս կգան Ռուսաստանի հետ խաղաղության բանակցություններից:
Պատրաստեց Վիկտորյա ԱՆԴՐԵԱՍՅԱՆԸ
Լուսանկարը՝ RBC-ի
