Ավանի ցերեկային կենտրոն հաճախող տարեցներին Թանգարանների միջազգային օրվա նախօրեին անակնկալ էր սպասվում։ Կենտրոնի սոցիալական աշխատող Անահիտ Գեւորգյանն առաջարկեց այս անգամ գնալ Եղիշե Չարենցի տուն-թանգարան։ Պարզվեց, որ կենտրոնի անդամներից եւ ոչ մեկը՝ երբեւէ չի եղել այդ թանգարանում։
«Տիկին Անահիտը միշտ նման գեղեցիկ ծրագրեր անում է․ Սարդարապատ, Մուսալեռ, Բյուրական ենք գնացել»,-ասում է Մարիամ Աղաջանյանը։ Տարեց այցելուներին՝ թանգարանի գիտաշխատողները ծանոթացրին Եղիշե Չարենցի կենսագրությանն ու գործունեությանը, պատմեցին հետաքրքիր դրվագներ բանաստեղծի կյանքից։ Կենտրոնի գրական խմբակի անդամներ Մարիամ Աղաջանյանն ու Ամալյա Գզողլյանն ասմունքեցին Եղիշե Չարենցի ստեղծագործություններից։
Կարդացեք նաև
«Այս մարդկանց հոգեւոր սնունդ է նաեւ պետք։ Ամեն մի նախաձեռնությունից հետո, երբ տեսնում ես տարեցների աչքերի փայլը, ինքդ էլ ես ոգեւորվում»,-ասում է կենտրոնի սոցիալական աշխատող Անահիտ Գեւորգյանը։
Կենտրոնի այցելուները ցանկություն ունեն Տաթեւ գնալու։ Տիկին Անահիտը վստահ է՝ կենտրոնի անդամների տարիքային շեմը չի խանգարի այդքան երկար ճանապարհ կտրել ու վայելել Տաթեւի վանական համալիրը։
Իսկ նախաձեռնությունը կյանքի կոչելու համար՝ պետք է աջակցողներ գտնվեն։
Լուսանկարներն ու տեսանյութը տրամադրել է ֆոտոլրագրող Ավետիս Մելքոնյանը
Արմեն ԴԱՎԹՅԱՆ
