Այսօր Ստեփան Դեմիրճյանը, «Հանրապետություն» կուսակցության նախագահ Արամ Սարգսյանը ԱԺ փոխխոսնակ Հակոբ Արշակյանի եւ ՔՊ պատգամավորների հետ ծաղիկ խոնարհեցին ԱԺ այգում տեղադրված Հոկտեմբերի 27-ի զոհերի հուշարձանի մոտ:
Մինչ այդ «Հայաստան» խմբակցության պատգամավորներն էին հարգանքի տուրք մատուցում: Աղվան Վարդանյանը լրագրողների հետ զրույցում ասաց, որ հիշողությունների գիրկը չի ուզում ընկնել, բայց 1999-ի հոկտեմբերի 27-ին առաջին վայրկյանից մինչեւ վերջ եղել է դահլիճում. «Մինչեւ առավոտյան 11-ի մոտ ոճրագործներին ավտոբուսով տեղափոխեցին մինչեւ ԱԱԾ-ի նկուղներ, հանձնեցինք ԱԱԾ-ին, նոր միայն բաժանվեցինք: Որ դա ոճրագործություն էր մեր պետականության հանդեպ, ասել եմ նույն այդ օրը: Իմ խորին համոզմամբ, այն, ինչ տեղի ունեցավ վերջին տարիներին Հայաստանում եւ Արցախում, դրա սկիզբը դրվել է Հոկտեմբերի 27-ի ոճրագործությամբ: Վերջերս անսպասելի մի արտահայտություն եղավ, որ այս իշխանությանը իշխանության են բերել այն ուժերը, որոնք արեցին Հոկտեմբերի 27-ը եւ դա ասել է ոչ թե պատահական մեկը, ասել է երջանկահիշատակ Վազգեն Սարգսյանի իրական եղբայրը՝ Արմեն Սարգսյանը: Այն, ինչ այսօր տեղի է ունենում Հայաստանում եւ Արցախում, Հոկտեմբերի 27-ի գործի բացահայտումը խանգարելու փորձերից մեկն է»:
Հարցին՝ նախկին դաշնակցական լրագրող Նաիրի Հունանյանին ինչպե՞ս էր հաջողվել զենքեր մտցնել ԱԺ-ի շենք՝ Աղվան Վարդանյանը հորդորեց ծանոթանալ դատավարության նյութերին. «Շուրջ երեք տարի ընթացել է դատավարությունը եւ այնտեղ մանրամասն նկարագրված են այդ բոլոր իրադարձությունները՝ ով է անցաթուղթ իջեցրել եւ այլն»:
Հարցին՝ Անդրանիկ Քոչարյանը դիմել է դատախազությանը, որ բացահայտեն Հոկտեմբերի 27-ը, այդ գործի հետ կապված հետաքրքիր մանրամասներ կան 5 պաշտոնների հետ կապված, ասում են՝ երբ քաղաքական գործիչների մարմինները դեռ խորհրդարանում են եղել, ներկայացվել է պահանջ պաշտոնների՝ Աղվան Վարդանյանը պատասխանեց. «Անդրանիկ Քոչարյանը ո՞վ է, այդ 5 անձանցից մեկն է, որը կարծեմ նպատակ ուներ դառնալու ՆԳ նախարար կամ նման մի բան: Այս իշխանությունները 2018-ին վերաբացել են գործը՝ իրենց ճոռոմ եւ ամպագորգոռ խոստումներով, ինչպես միշտ, 3 տարի անցել է, որեւէ բան չեն բացահայտել, հիմա Անդրանիկ Քոչարյան ասվածը թող նորից դիմի: Կարծեմ մի կին էլ կա, նա էլ է պարբերաբար դիմում»:
Կարդացեք նաև
Հռիփսիմե ՋԵԲԵՋՅԱՆ
