ՀՀ ԱԺ «Պատիվ ունեմ» խմբակցության պատգամավոր Աննա Մկրտչյանը երեկ Ստեփանակերտի «Վերածննդի» հրապարակում կայացած արցախահայության բազմահազարանոց հանրահավաքի մասին «Հայելի» ակումբում ասաց, որ դա հանրահավաք էր հույսի մասին, հայրենիքում ապրելու, մարտահրավերներին դիմակայելու պատրաստակամության մասին: «Այն, ինչ արեց երեկ արցախահայությունը, իրականում հպարտանալու առիթ է տալիս յուրաքանչյուր հայի աշխարհի ցանկացած ծայրում: Բայց այդ ոգեւորության նոտան, ինձ թվում է, պետք է հիմնված լինի բացառապես ինչ-որ բազային պայմանների վրա, որոնցից մեկը, ես կարծում եմ, չկար ի դեմս Արցախի իշխանության պատրաստակամության եւ կամքի բացակայության: Ես երեկ տեսել եմ արցախահայության կամքը: Ես ուղիղ եթերում տեսել եմ նաեւ այն ոչ կոմֆորտ վիճակը, որում գտնվում է ր Արայիկ Հարությունյանը»:
Անդրադառնալով այսօր Սոչիում կայանալիք Պուտին-Ալիեւ-Փաշինյան եռակողմ հանդիպմանը՝ Աննա Մկրտչյանն ասաց, որ սա նույն կազմն է, որտեղ Հայաստանը ներկայացնողը նոյեմբերի 9-ին ստորագրեց Արցախի կապիտուլյացիան եւ հիմա էլ գնում է Հայաստանի կապիտուլյացիան ստորագրելու: Պատգամավորը օրինաչափ է համարում, որ Պուտինն առաջնորդվելու է իր երկրի շահերով, Ալիեւը չի փոխել Հայաստանը վերացնելու ցանկությունը եւ ցավ է հայտնում, որ մենք չունենք մեր օրինաչափությունը: «Հնարավոր չէ, որ հայանպաստ որեւէ հարց լուծվի, եթե բանակցողները ներկայիս իշխանության բարձրաստիճան պաշտոնյաներն են: Նիկոլը մի խնդրանք ունի թե Պուտինից, թե Ալիեւից, թե Էրդողանից: Դա իր աթոռը եւ անվտանգությունը պահպանելու խնդրանքն է»,- ասաց Աննա Մկրտչյանը:
Նա խոսեց նաեւ «Պատիվ ունեմ» դաշինքի՝ խորհրդարան վերադառնալու մասին: «Ես խորհրդարանում մեկ տարի եղել եմ մի բանի համար. որպեսզի դրանք չունենան իրենց կոմֆորտի խորհրդարանը: Որպեսզի դրանք լինեն դիսկոմֆորտի մեջ: Որպեսզի, ինչպես 7-րդ գումարման ԱԺ-ում էր՝ ջան ասել ջան լսելը չլինի: Որպեսզի ամենօրյա ռեժիմով հիշեն, որ դավաճան են, կապիտուլյանտ են, որ մենք բոլորս գիտենք, թե իրենք ինչի համար են եկել, ինչի համար են մնում եւ ինչով են զբաղվում: Ու եթե հիշում եք, երբ նոր էինք գնացել խորհրդարան, նրանք ամեն ինչ փորձում էին անել, որ իրենց առաջնորդին դավաճան, կապիտուլյանտ չասենք: Բայց հիմա նա հաշտվել է դրա հետ, հասկանում է, որ հայ հանրությանն այլեւս անհնար է համոզել, որ ինքը դավաճան չէ: Հիմա խոսում է երկակի կապիտուլյացիայի անհնարինության մասին: Ես իրեն շատ կարճ պատասխանել եմ. քեզ տվել էին երկու հայկական պետականություն, դրա համար դու երկու կապիտուլյացիա ես կնքելու: Երեքը տային՝ երեքը կստորագրեիր:
Խորհրդարան վերադառնալու մասին: Ես դժվար եմ պատկերացնում, որ Հայաստանում կգտնվի մի գիտակից քաղաքացի, որը կմտածի, թե խորհրդարան գնալը հաճույք է, մեծամասնության հետ աշխատելը հաճույք կամ առավելություն է: Պատիժ ու անսահման պատասխանատվություն է: ԱԺ գնալը իրենց հետ աշխատելու մասին չէ: ԱԺ գնալը ԱԺ ղեկավարությանն ու Նիկոլին զրկելն է հնարավորությունից, որ իրենք կարողանան հունվարին զրկել եւ ստանալ իրենց երազածը՝ ընդդիմադիր պատգամավորների բացակայությունը: Մենք այնտեղ ենք մանդատը որպես իրենց դեմ պայքարելու գործիք ունենալու համար, ինչպես եղել է մեկ տարի առաջ»:
Կարդացեք նաև
Աշոտ ՀԱԿՈԲՅԱՆ
