Շտրիխներ Սլովակիայի մայրաքաղաքից
Սլովակիայի մայրաքաղաք Բրատիսլավան, անշուշտ, գեղեցիկ է, սակայն մեկ-երկու օրը բավական է նրանից «կշտանալու» համար:
Բրատիսլավան հիմնականում իբրեւ տրանզիտային քաղաք է՝ սահմանակից Ավստրիա եւ Հունգարիա հասնելու համար:
Բրատիսլավան խաղաղ է, մարդիկ բարեհամբույր են, այն թերեւս, ամենահարմար հանգստավայրերից մեկն է հատկապես մեծահասակների համար:
Կարդացեք նաև
Ի տարբերություն նոր Բրատիսլավայի, հին քաղաքն անչափ գեղեցիկ է եւ հարմար ոտքով շրջելու համար:
Բրատիսլավայի կենտրոնական մասում, Դանուբի ափին բլրի վրա վեր է խոյանում Բրատիսլավա ամրոցը, որը Սլովակիայի մշակույթի ազգային հուշարձանների ցանկում է։ 
Բրատիսլավայի հին կենտրոնում բազմաթիվ մշակութային, պատմական եւ ճարտարապետական ուշագրավ հուշարձաններ կան, ամենուրեք հետաքրքիր քանդակներ են տեղադրված, որոնց հետ զբոսաշրջիկները սիրով լուսանկարվում են:
Բրատիսլավայում կանգնեցրել են նաեւ Անդերսենի արձանը, ասում են, երբ նրան խնդրել են հեքիաթ պատմել, հեքիաթասացը բացականչել է. «Ի՞նչ հեքիաթ պատմեմ, երբ ձեր քաղաքը տեղով հեքիաթ է»: Ի դեպ, Բրատիսլավայի ամենաթանկ հյուրանոցը նախագծել է նույն մարդը, որը նաեւ Տիտանիկի նախագծողն է եղել:
Բրատիսլավա կարելի է այցելել տարվա ցանկացած եղանակի, որովհետեւ այստեղ կլիման մեղմ է: Ցնցող է հին Ռատուշան, իսկ Միխաիլի հնագույն դարպասները թվագրվում են 14-րդ դար: Կլասիցիզմի ոճով կառուցած արքեպիսկոպոսական տաճարն էլ համարվում է ողջ Սլովակիայի ամենագեղեցիկ շինություններից մեկը: Մոդեռն կառույցներից յուրօրինակ է Կապույտ եկեղեցին կամ Սուրբ Ելիզավետայի տաճարը, որը կառուցվել է 20-րդ դարի սկզբին:
Ընդհանրապես Բրատիսլավայի կենտրոնը միավորում է բոլոր երանիները՝ այստեղ կարելի է եւ աչքը շոյել, եւ համեղ սնվել տեղական խոհանոցի բարիքներով, եւ գեղեցիկ հուշանվերներ գնել:
Բրատիսլավայի կենտրոնում է գտնվում նաեւ Հայաստանի պատվավոր հյուպատոսությունը:
Նշենք, որ Հայաստանի եւ Սլովակիայի միջեւ դիվանագիտական հարաբերությունները հաստատվել են 1993թ. հունվարին:
Գոհար ՀԱԿՈԲՅԱՆ
Բրատիսլավա-Երեւան
«Առավոտ» օրաթերթ
18.11.2022
