«Ինչպե՞ս եք վերաբերվում այդ փաստին, ձեր արձագանքը, գործողությունները որո՞նք են՝ որպես լիազոր մարմին։ Կարեւոր խնդիր է։ Դիրքորոշում չունենալը ճիշտ չէ»,-ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի այսօրվա նիստում ԿԳՄՍ փոխնախարար Ալֆրեդ Քոչարյանից հետաքրքրվեց «Հայաստան» խմբակցության պատգամավոր Լիլիթ Գալստյանը՝ մեջբերելով մամուլի հրապարակումներն այն մասին, որ 2020-ին հարուցված քրեական գործով հայաստանյան պատմամշակութային արգելոցներից մեկի վարիչը մանկապղծության մեջ է մեղադրվում․ խոսքը 16 տարին չլրացած տղայի նկատմամբ պարբերաբար անառակաբարո գործողություններ կատարելու մասին է։
ԿԳՄՍ փոխնախարար Ալֆրեդ Քոչարյանը (լուսանկարում) պատասխանեց․ «Չեմ հասցրել տեղեկանալ, չեմ տիրապետում տեղեկությանը, բայց հարցը չի կարող նորմալ ընկալվել նախարարության կողմից։ Կարծում եմ՝ առաջնահերթ պետք է լինի անմեղության կանխավարկածը, բայց եթե նման բան առկա է, ՊՈԱԿ-ը, մենք այս հարցով կզբաղվենք»։
Լիլիթ Գալստյանը շարունակեց․ «Չէի ուզում մանրամասնել, բայց նա վեց տարվա պայմանական դատվածություն ունի, որն ուժի մեջ է մտել։ Ուստի ՊՈԱԿ-ը պետք է տեղյակ լիներ։ Իր պաշտոնի եւ մանկահասակ երեխաների հետ գործ ունենալու անհամատեղելիության մասին է խոսքը»։
Կարդացեք նաև
Փոխնախարարը համաձայնեց դիտարկման հետ։
Լուիզա ՍՈՒՔԻԱՍՅԱՆ
