ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում այսօր քննարկվեց ընդդիմադիր «Հայաստան» խմբակցության պատգամավոր Լիլիթ Գալստյանի օրենսդրական նախաձեռնությունը՝ «Տեսալսողական մեդիայի մասին» օրենքում փոփոխություններ եւ լրացումներ կատարելու մասին:
Ըստ այդմ, ընդդիմադիր պատգամավորն առաջարկում է, որ Հանրային հեռարձակողի կառավարման խորհրդում եւ Կարգավորող պետական մարմնում որեւէ սեռի ներկայացվածությունը 2-ից պակաս չլինի: Առաջարկը, ըստ ընդդիմադիր պատգամավորի ներկայացրած հիմնավորումների, պայմանավորված է գործող օրենքում առկա անորոշությունները վերացնելու եւ Հանրային հեռարձակողի կառավարման մարմնում, ինչպես նաեւ Կարգավորող պետական մարմնում կին թեկնածուների համար առկա խոչընդոտները նվազեցնելու անհրաժեշտությամբ:
Լիլիթ Գալստյանը երկար թվարկեց բոլոր միջազգային փաստաթղթերը, որոնց միացել է Հայաստանը՝ պետական կառավարման տարբեր ոլորտներում կանանց ներգրավվածություն ապահովելու պարտավորությամբ եւ նկատեց, որ կանանց ներգրավվածության ինդեքսում, վերջին տարիներին նահանջ ենք գրանցել: Նա հույս ունի, որ օրենսդրական ամրագրումներով եւ իշխանության քաղաքական կամքով որոշակի ճեղքում հնարավոր կլինի ապահովել: Ընդդիմադիր պատգամավորն ասաց․ «Օրենսդրական ամրագրումներով ու քաղաքական կամքով մենք կարող ենք դարձյալ փոքր քայլերով որոշակի ճեղքում առաջացնել»:
Լիլիթ Գալստյանը այս կառույցներում կանանց ներգրավվածության առումով նաեւ միջազգային փորձից օրինակներ բերեց. Իռլանդիայում խորհուրդը 9 անդամ ունի, որոնցից նվազագույնը 4-ը պիտի կին լինեն, Իսրայելում՝ 19-ից 6-ը, Արգենտինայում՝ հավասար ներգրավվածության սկզբունքն է գործում, Ֆրանսիայում, գենդերային հավասարության ինդեքսն է գործում, որը 45-50 տոկոսի շրջանակում է : Պատգամավորը նկատեց՝ «նույնիսկ կոռեկտ չէ ասելը, Մոլդովայում նույնպես խորհուրդը բաղկացած է 9 անդամից եւ հավասարության սկզբունքը կա»: Մոլդովայի օրինակը ծիծաղ առաջացրեց դահլիճում:
Կարդացեք նաև
Հանձնաժողովի ՔՊ-ական պատգամավորները ողջունեցին ընդդիմադիր պատգամավորի նախաձեռնությունը՝ առաջարկելով 2-ի փոխարեն 3-ը ամրագրել: Նախագիծն ընդունվեց միաձայն:
Մանրամասները՝ տեսանյութում
Նելլի ԳՐԻԳՈՐՅԱՆ
