Քիչ առաջ դատարանը որոշում կայացրեց մերժել ՀՀ երրորդ նախագահ Սերժ Սարգսյանի փաստաբան Ամրամ Մակինյանի՝ դատավոր Կարապետ Բադալյանի ինքնաբացարկի միջնորդությունը։
Ինչպես արդեն տեղեկացրել ենք, ՀՀ գլխավոր դատախազությունն՝ ընդդեմ Սերժ Ազատի Սարգսյանի, Սաթենիկ Սերժի Սարգսյանի, Անուշ Սերժի Մինասյանի, երրորդ անձ «Արարատբանկ» ԲԲ ընկերության՝ ապօրինի ծագում ունեցող գույքի բռնագանձման պահանջի մասին գործով դատական նիստի ժամանակ Ամրամ Մակինյանը հրապարակեց փաստեր, որոնց հիման վրա հայտնեց դատավորին ինքնաբացարկի միջնորդությունը։
Նա մասնավորապես հայտարարել էր․ «Դուք Լուսինե Խառատյանի ամուսինն եք, ում մայրը Հրանուշ Խառատյանն է, եղբայրը՝ Արսեն Խառատյանը։ Որպես Արսեն Խառատյանի քրոջ ամուսին՝ դատավոր Կարապետ Բադալյանը չէր կարող չիմանալ Արսեն Խառատյանի՝ նման ընկալումների մասին և չէր կարող բացասաբար տրամադրված չլինել այդ ժամանակվա ՀՀ իշխանությունների, մասնավորապես ՀՀ նախագահ ընտրված, սույն գործով պատասխանող Սերժ Սարգսյանի նկատմամբ։ Կարապետ Բադալյանի մերձավոր ազգական Հրանուշ Խառատյանը հրապարակային և տարիներ շարունակ նույնպես ընդգծված բացասական վերաբերմունք է դրսևորել Սերժ Սարգսյանի նկատմամբ, ավելին՝ բացասական վերաբերմունք է դրսևորել մինչև 2018-ը գոյություն ունեցող դատական համակարգի նկատմամբ և դատական համակարգի առողջացումը տեսել է դատավորների կազմի փոփոխության մեջ, ում ցանկությունը տվյալ դեպքում արտահայտվել է Կարապետ Բադալյանի՝ որպես դատավոր նշանակվելով։ Ներկայացված վերլուծությունը թույլ է տալիս հիմնավորված կարծիք հայտնել, որ հանդիսանալով Հրանուշ Խառատյանի մերձավոր ազգական, իսկ Արսեն Խառատյանը Ձեր կնոջ եղբայրն է, Դուք չեք կարող նույնպես բացասական վերաբերմունք չունենալ Սերժ Սարգսյանի նկատմամբ»։
Տաթև ՀԱՐՈՒԹՅՈՒՆՅԱՆ