Տեղեկացրել էինք, որ Էջմիածնի «Քիմիկների» զորամասի անհետ կորած զինծառայողների ծնողները բողոքի ցույց են անում, նրանք փակել են Բաղրամյան պողոտան։ Ծնողները պահանջում են հանդիպում վարչապետի հետ։
Բաղրամյան-Պռոշյան հատվածում ճանապարհը փակ է, խցանում է։ Ժամանակ առ ժամանակ իրավիճակը լարվում է վարորդների, քաղաքացիների եւ ծնողների միջեւ։
Մի տարեց մարդ մոտենալով ծնողներին սադրիչ հարցեր տվեց՝ որտե՞ղ է քո երեխան, Ադրբեջանո՞ւմ, դե գնա Բաքու։ Այս խոսքերը վրդովեցրին ծնողներին․ «Ինչի՞ գնամ Բաքու, Բաքո՞ւն է իմ երեխեուն բանակ տարել»։ Որպեսզի իրավիճակն էլ ավելի չթեժանա, ոստիկանները տարեց մարդուն հեռացրեցին տարածքից։
Տարածքում չնայած ավտոմեքենաները կանգնած են, վարորդները սպասում են, թե երբ կբացվի ճանապարհը, սակայն կան մեքենաներ, որոնք հասնելով խաչմերուկին՝ շրջադարձ են կատարում։ Քիչ առաջ պարեկային ծառայողներից մեկը վրաերթի ենթարկվեց, որից հետո ոստիկանները որոշեցին պողոտան ոստիկանական մեքենաններով փակել, որպեսզի տարածք մուտք գործել հնարավոր չլինի։
Կարդացեք նաև
Հիշեցնենք, որ ծնողները հունիսի 19-ին նույնպես բողոքի ցույց էին անում, նախ՝ կառավարության շենքի մոտ՝ պահանջելով հանդիպում վարչապետ Նիկոլ Փաշինյանի հետ, որն այդպես էլ տեղի չունեցավ, ապա՝ նախագահական նստավայրի մոտ՝ կրկին պահանջելով հանդիպում նախագահի հետ, որը նույնպես տեղի չունեցավ։
Parents of the missing soldiers blocked Baghramyan and Proshyan streets of Yerevan, Armenia
Այսօր էլ ծնողներին ասել են՝ սպասել, թե երբ կլինի հանդիպումը, պարզ չէ։
Parents of the missing soldiers blocked Baghramyan and Proshyan streets of Yerevan, Armenia
Հիշեցնենք, ըստ հարուցված քրգործի, Էջմիածնի «քիմիկների» զորամասի զինծառայողները 2020-ի հոկտեմբերի 21-ին տեղափոխվել են Զանգելան։ Ըստ մեղադրանքի՝ գեներալ-լեյտենանտ Անդրանիկ Մակարյանը, որը Ադրբեջանի Հանրապետության կողմից Արցախի Հանրապետության դեմ սանձազերծած ագրեսիվ պատերազմի ընթացքում հայտարարված ռազմական դրության պայմաններում Զանգելանի մարտական հատուկ առաջադրանքի պատասխանատուն էր, հոկտեմբերի 20-ին՝ տեղեկանալով, որ Արսեն Աբգարյանի խումբը շրջափակման մեջ է հայտնվել, օգնության չի շտապել։ Գեներալը նահանջի հրաման է տվել՝ վերադառնալով Կապան։ Այս ամենի հետեւանքով 62 հոգուց բաղկացած անձնակազմը հայտնվել է հակառակորդի շրջափակման մեջ։ Շրջափակումից կարողացել են դուրս գալ միայն 22 զինծառայող, իսկ մնացած 40 զինծառայողների մի մասը հակառակորդի հարձակման զոհ են դարձել, 5-ը՝ գերեվարվել, 24-ի գտնվելու վայրն անհայտ է։ Մեղադրանք է առաջադրվել ՀՀ զինված ուժերի գլխավոր շտաբի պետի նախկին տեղակալ, գեներալ–լեյտենանտ Անդրանիկ Մակարյանին, N զորամասի հրամանատար, փոխգնդապետ Արսեն Աբգարյանին, պատերազմի ժամանակ նույն զորամասի շտաբի պետ, փոխգնդապետ Սարգիս Կուլակչյանին եւ զորամասի համալրման բաժանմունքի նախկին պետ, կապիտան Էլլադա Հարությունյանին։
Նելլի ԲԱԲԱՅԱՆ
