Ինչպես տեղեկացրել ենք, այսօր «Ապրելու երկիր» կուսակցությունը քարոզարշավը սկսեց Երեւանի Արաբկիր վարչական շրջանից:
Կոմիտասի պողոտայում շատ շենքերի վրա կառուցվել են ապօրինի շինություններ, վերնահարկեր:
Aravot.am-ը կուսակցության համահիմնադիր եւ նախընտրական շտաբի ղեկավար Մեսրոպ Առաքելյանին հարցրեց՝ որեւէ լուծում կա՞ դրանց հետ կապված: Նա պատասխանեց. «Ցավոք, ոչ միայն Կոմիտասում, ամբողջ քաղաքում է այդպես՝ 90-ականներից սկսած: Շենքերը առաջ են տալիս, վերեւի հարկեր կառուցում ու ոչ միայն ճարտարապետական տեսքն են գցում, այլ շատ կարեւոր է խոսել անվտանգությունից, կարող է ամբողջ շենքի անվտանգությունը խաթարեն: Շինարարության մեջ որոշ գործողություններ կան, որ կարելի է ասել՝ անդառնալի են դառնում, բայց ամեն դեպքում մենք անելու ենք առավելագույնը, որ նախ շենքերի անվտանգությունը չխաթարվի նման կցակառույցների պատճառով, ու նաեւ փորձելու ենք շենքերը բերել նորմալ ճարտարապետական տեսքի: Այն, որ նման «շուստրիությունները» պետք է վերանան, միանշանակ է: Ցավալի է, որ եթե նայում ես ինչ-որ բնակելի շենքի, 50 բնակիչներից մեկ-երկուսը, որպես շուստրի, հանրային տարածքի հաշվին, այգու հաշվին առաջ են տալիս իրենց բնակարանները՝ մանավանդ առաջին հարկերը: Այդ ամենին պետք է տրվի վերջնական լուծում, եւ նման դեպքերը իսպառ պետք է բացառել»:
Կարդացեք նաև
Դիտարկմանը՝ նոր իշխանությունները բացատրում են, թե նախկինները տվել են սեփականության վկայական, ու եթե դրանք քանդվեն, սեփականության իրավունքը կխախտվի՝ Մեսրոպ Առաքելյանը պատասխանեց. «Սեփականության իրավունքի խախտումը, իհարկե, անընդունելի է, բայց պետք է նաեւ հասկանանք, թե ինչ պայմաններում եւ ինչ մեխանիզմներով են թույլտվությունները տվել, արդյոք այդ ամենը տվե՞լ են օրենքի շրջանակներում, եւ արդյոք այդ մարդիկ հանդիսանո՞ւմ են բարեխիղճ շահառու այսպես ասած: Շատ հաճախ մենք ականատես ենք եղել բազմաթիվ դեպքերի, որ նման պրոցեսներն իրենց մեջ պարունակել են նաեւ կոռուպցիոն մեծ ռիսկեր: Ցավով եմ արձանագրում, որ այս 5 տարվա ընթացքում այդպես էլ համակարգային այդ խնդիրների կոռուպցիոն ռիսկերը չբացահայտվեցին: Այդ պարագայում հնարավորություն կստանանք այդ խնդիրների մի մասը միանգամից կարգավորել»:
Հռիփսիմե ՋԵԲԵՋՅԱՆ
