Ադրբեջանի նախագահ Իլհամ Ալիևը հեռախոսազրույց է ունեցել Ռուսաստանի իր գործընկեր Վլադիմիր Պուտինի հետ:
Կրեմլի հաղորդագրության համաձայն՝ Իլհամ Ալիևը ներողություն է խնդրել և խորը ցավակցություն հայտնել սեպտեմբերի 20-ին Ղարաբաղում ռուս խաղաղապահ զորակազմի զինծառայողների ողբերգական մահվան կապակցությամբ: Նա ընդգծել է, որ ամենափութաջան կերպով քննություն կանցկացվի կատարվածի վերաբերյալ, և բոլոր մեղավորներն արժանի պատիժ կկրեն: Այդ հարցով երկու երկրների գլխավոր դատախազությունները սերտ կապի մեջ են: Ալիևը նաև պատրաստակամություն է հայտնել նյութական օգնություն ցուցաբերել զոհվածների ընտանիքներին:
Ըստ հաղորդագրության՝ երկու նախագահները կարևորել են խաղաղապահների միջնորդությամբ ձեռք բերված կրակի դադարեցման վերաբերյալ պայմանավորվածությունների հետևողական իրականացման կարևորությունը: Այդ համատեքստում առավել մեծ նշանակություն է տրվել ռուսական միջնորդությամբ Բաքվի ու Ստեփանակերտի երկխոսությանը:
Բացի այդ, քննարկվել են տարածաշրջանում իրավիճակի հետագա կայունացմանն ու հումանիտար խնդիրների հաղթահարմանն ուղղված առաջնահերթ քայլեր: Վլադիմիր Պուտինը շեշտել է Ղարաբաղի հայ բնակչության իրավունքներն ու անվտանգությունն ապահովելու անհրաժեշտությունը: Ադրբեջանական կողմը պատրաստակամություն է հայտնել այդ հարցում համագործակցել ռուս խաղաղապահների հետ:
Կարդացեք նաև
Կողմերը նաև պայմանավորվել են ակտիվացնել աշխատանքը բանակցային ուղղությամբ՝ հիմնվելով 2020-2022թթ. բարձր մակարդակով եռակողմ հայտնի պայմանավորվածությունների վրա, առաջին հերթին տրանսպորտային կապերի ապաշրջափակում, հայ-ադրբեջանական սահմանի սահամանազատում և Բաքվի ու Երևանի միջև խաղաղության պայմանագրի նախապատրաստում:
Պատրաստեց Վիկտորյա ԱՆԴՐԵԱՍՅԱՆԸ
Հ․ Գ․ Երեկ զոհված խաղաղապահների թվում է եղել ԼՂ-ում ռուսական խաղաղապահ զորախմբի հրամանատարի 52-ամյա տեղակալ, առաջին աստիճանի կապիտան Իվան Կովգանը, հայտնում է SeverPost գործակալությունը։
Սեպտեմբերի 20–ին «ՈւԱԶ»-ի գնդակոծման հետևանքով հայ բնակչությանը պաշտպանելիս զոհվել է հինգ ռուս խաղաղապահ, գրել էր «Ռոսիա սեգոդնյա» լրատվական գործակալության գլխավոր խմբագիր Մարգարիտա Սիմոնյանը։
Նրանց թվում են հրամանատարի երկու տեղակալները։ Կատարվում է հետաքննություն, սակայն Ադրբեջանի ՊՆ-ն «ափսոսանք է հայտնել տեղի ունեցածի համար»։
Լուսանկարը՝ արխիվային
