Քննչական կոմիտեից Aravot.am-ին հայտնեցին, որ «արցախցիներին օգնությունից զրկելու» կոչեր անելու դեպքով քրեական վարույթ չի նախաձեռնվել՝ հիմքերի բացակայության պատճառով:
Պարզվում է, որ գլխավոր դատախազությունը ուսումնասիրել ու կոմիտե էր ուղարկել միայն Սուրենավան վարչական շրջանի ղեկավար Անի Վարդազարյանի կոչերի մասով քրեական վարույթ նախաձեռնելու հարցը լուծելու վերաբերյալ գրություն; Մինչդեռ հիշեցնենք, որ նման կոչեր էին արել նաեւ «Քաղաքացիական պայմանագրի» անդամ Թաթուլ Ասիլյանը, վարչապետի տիկին Աննա Հակոբյանին կամավորության սկզբունքով ներկայացնող Ստելլա Սարուխանյանը եւ ուրիշներ:
Հիշեցնենք նաեւ, որ Անի Վարդազարյանն իր գրառմանը հետեւած հակազդեցությունից հետո հրապարակային ներողություն էր խնդրել՝ բացատրելով, թե կարծիք է ստեղծվել, որ դեմ է արցախցուն օգնելուն. «Սակայն ասածս ենթադրում է հետևյալը. ամենքս հիմա պատրաստ ենք միայն ու միայն աջակցելու, սակայն մեր աջակցությանը զուգահեռ ձեր հրապարակում հայտնվելը, խառնվելը ներքին ներքաղաքական գործերին, հարված է մեզ թիկունքից ու թշնամու հարվածին համարժեք։ Դեմ եմ այս ծանր իրավիճակում հրապարակում բողոքի ձայն բարձրացնելուն, այն բողոքին, որով ոչնչով մեկս մյուսիս չենք օգնում»։
Փաստաբան Ամրամ Մակինյանը դատախազություն հանցագործության մասին հաղորդում էր ներկայացրել Սուրենավանի համայնքապետի՝ արցախցիների վերաբերյալ կատարած գրառման կապակցությամբ։ Aravot.am-ի հետ զրույցում փաստաբանն անդրադառնալով Քննչական կոմիտեի կողմից քրեական վարույթ նախաձեռնելու հարցի մերժմանը՝ ասաց, որ ինքն ընդամենը արձանագրել է փաստը, իրավապահներն ինչպես ուզում են, այնպես վարվում են, բայց կգա Հայաստանում իշխանություն ու այլ գնահատական կտա ու գնահատական կտա, գնահատական չտվողների գործողություններին:
Կարդացեք նաև
Արփինե ՍԻՄՈՆՅԱՆ
