Էկոնոմիկայի նախարար Վահան Քերոբյանին լրագրողները հարց ուղղեցին՝ իրավապահներն ինչո՞ւ են այսօր խուզարկություն սկսել էկոնոմիկայի նախարարությունում։ «Ես չգիտեմ՝ ինչու են մտել։ Քննչական մարմինները պետական կառավարման մարմիններ կարող են մտնել հիմնականում կոռուպցիոն գործերով։ Եվ մենք, բնականաբար, կարեւորում ենք կոռուպցիայի դեմ պայքարը։ Բայց միաժամանակ հարգում ենք մարդկանց անմեղության կանխավարկածը։ Ուրիշ հարց մի տվեք, ես տեղյակ չեմ»,- ասաց Քերոբյանը։
Հարցին, թե փոխնախարար Անի Իսպիրյանի պաշտոնից ազատումը կապ ունի՞ իրավապահների գործողությունների հետ, Քերոբյանը պատասխանեց․ «Իմ կարծիքով՝ դա պատահականություն է։ Անին ասել էր, որ ամուսինն աշխատանք է ստացել Հոլանդիայում, իրենք պատրաստվում են տեղափոխվել։ Եվ տեղափոխվելուց մի քանի օր առաջ դիմում է դրել»։
Հարցին, թե ԱԱԾ աշխատակիցնե՞րն են խուզարկություն իրականացնում, Քերոբյանը պատասխանեց, որ չգիտի․ «Ես հարգում եմ իրավապահ մարմինների աշխատանքը, իրենք իրենց գործն են արել։ Ես Ազգային ժողովում էի, դեռեւս ոչ մի նորություն չունեմ»։
Նշենք, որ ըստ «Հրապարակի»՝ էկոնոմիկայի նախարարությունում խուզարկում են երեկ աշխատանքից ազատված փոխնախարար Անի Իսպիրյանի աշխատասենյակը, առգրավել են նրա իրերը։
Կարդացեք նաև
ԶԼՄ–ները հաղորդում են, որ Անի Իսպիրյանը ձերբակալվել է։
Ռոզա ՀՈՎՀԱՆՆԻՍՅԱՆ
