«Քննչական կոմիտեի երեկվա հաղորդագրությունից հետո եւս մեկ անգամ համոզվում եմ, որ իրեն քաղաքական հետապնդման են ենթարկում, որ իրերը իրենց անունով է կոչում»,- Aravot.am-ի հետ զրույցում ասաց 2024 թվականի փետրվարին Երևանի մի քանի հասցեներում պայթուցիկներ տեղադրելու և պայթեցումների միջոցով ահաբեկչության կազմակերպման մեղադրանքով անցնող դաշնակցական Գագիկ Սարգսյանի որդին՝ Արամ Սարգսյանը:
Հիշեցնենք, որ երեկ կոմիտեն հայտնեց, որ քննության ընթացքում ձեռք բերված փաստական տվյալներով՝ պարզվել է, որ Երևան քաղաքի Նոյ թաղամասի 143/1 տան բակում պայթյունի իրականացմանը, ինչպես նաև Երևան քաղաքի Գ.Գյուլբենկյան փողոցի 33-րդ շենքի և Գյուլբենկյան 30/3 հասցեում գտնվող «Քաղաքացիական պայմանագիր» կուսակցության գրասենյակի մոտ պայթուցիկ սարքերի տեղադրման կազմակերպմանը, բացի վարույթով մեղադրյալ Գագիկ Սարգսյանից և ինքնությունները դեռևս չբացահայտված անձանցից, մասնակցել է նաև 42-ամյա Գ․ Վ․-ն:
Արամ Սարգսյանի լուսանկարը՝ ֆեյսբուքյան էջից
«Սարքված, շինծու գործ է: Եթե հայրս տարիքով ավելի մեծ լիներ, շատ հանգիստ կարող էին Քենեդու սպանությունը իրեն մեղսագրել: Որեւէ լուրջ ապացույց չունեն հորս հետ կապված, որ ասում են, թե ահաբեկչության կազմակերպիչ է: Ընդամենը մի հեռախոսազանգի հիման վրա որոշել են, որ կազմակերպիչ է: Բայց այդ երկար բառակույտը, իրավական անգրագետ ձեւակերպումներով, այդքան հայտարարություն, որ արեցին, տպավորություն է թողնում, որ դեպքը վերցրել ու ահաբեկչության մասին հոդվածին սիրուն հարմարեցրել են:
Որ ասում են, թե կոնկրետ այսինչ պատգամավորին իրենց համար անընդունելի հայտարարություններից ձեռնպահ մնալուն հարկադրելու նպատակով էս ինչ գործողություններն են արել, դա փաստացի ո՞նց է ապացուցվում, ուղղակի դատարկ խոսքեր են, ջուր է»:
Կարդացեք նաև
Մեր զրուցակիցը նաեւ նկատեց, որ երեկվա հաղորդագրության մեջ նշված չէր նաեւ, թե կոնկրետ ինչ դեպքի մասին է խոսքը. «Ո՞ր թվին է եղել, ամսի քանիսի՞ն: Ինչքան գիտեմ՝ 2022 թվին ինչ-որ բան է եղել, այսինքն՝ 2022 թվին ենթադրյալ ինչ-որ արարք հիմա կցել են սրան, ասում են՝ էս էլ է սրա հետ կապված, էս էլ ես դու արել: Հաղորդագրության մեջ չեն նշել, որ թվականին, ամսի քանիսին»:
Արփինե ՍԻՄՈՆՅԱՆ
Գլխավոր լուսանկարը՝ Գագիկ Սարգսյանի ֆեյսբուքյան էջից
