Ինչպես տեղեկացրել ենք, Տավուշի մարզպետ Հայկ Ղալումյանը հանդիպեց Կիրանցի ճանապարհը փակած բնակիչների հետ:
«Հայաստան» խմբակցության պատգամավոր Գառնիկ Դանիելյանն ասաց, որ սահմանազատման, սահմանագծման այս գործընթացն ապօրինի է ու իրենք պահանջում են, որ նախ ադրբեջանցիները Ջերմուկից «ռադ լինեն». «Չկա որեւէ երաշխիք, որ Ադրբեջանը չի դրժի իր խոստումները եւ հաջորդ անգամ չի հարձակվի այս տարածքներն օկուպացնելու: Դա խոստովանել է նաեւ երկրի վարչապետը: Որեւէ երաշխիք չկա, որ Ադրբեջանը վաղը հարձակում չի գործելու այլ տարածքների վրա: Ադրբեջանը մինչ այսօր իր բոլոր խոստումները խախտել է, ցեղասպան, հանցագործ է, այս իշխանությունները իրավունք չունեն իրականացնել ոչ լեգիտիմ գործընթաց: Սա պետք է դրվի հանրաքվեի, թող ժողովուրդը որոշի: 2018-ին ասում էին՝ ժողովուրդն է որոշելու: Ժողովուրդը եթե որոշի, որ իր համաձայնությունը տալիս է, դա կհամարվի օրինական իսկ այն, ինչ հիմա անում են, օրինականության հետ որեւէ աղերս չունի: Մենք այն որոշումը չպիտի կայացնենք, որ վաղը մյուս օրը մեր սերունդները այստեղ վախի մթնոլորտում ապրեն: Ասում էին՝ նշաձողն իջացրեք, նշաձողն իջացրեցին գնացին փռթեցին էդ մարդկանց, ո՞ւմ հավատան հիմա: Այս մարդկանց անվտանգության հարցն է»:
Բնակիչները բղավում էին՝ անվտանգության հարց չի սա միայն, մեր զինվորների արյունով գծված տարածքներն են: Ղալումյանը փորձեց հանգստացնել, բնակիչներն ասում էին. «Դե ձեր ախպերներն են, դուք ականները հանեք, հանգիստ նստեք, մեզ են մորթելու»:
Ղալումյանն ասաց, թե ոչ մեկը ական չի հանել: Նրան հակադարձեցին՝ «բա էն ո՞վ էր տրաքել Բերքաբեր գյուղում՝ Գեւորգ Մարդանյան ազգանունով՝ 1980-ին ծնված, էնպես չի, որ մենակ դուք ինֆորմացիա ունեք»:
Կարդացեք նաև
Ղալումյանն էլ իրեն ուղղեց՝ ասելով, որ Կիրանցի հատվածում ականազերծում չի եղել, դա եղել է Ոսկեպարում:
Բնակիչները Ղալումյանի հետ վիճում էին՝ խոստումները չպահելու համար. «Դուք չէի՞ք եկել ու ասում էիք, թե աշխատանք չի կատարվի, մինչեւ Մհեր Գրիգորյանը չգա, չհանդիպի, բայց շաբաթ առավոտը Խանումը վեր է կացել ու տեսել՝ իր հողամասի կողքը չափագրում են: Դո՞ւք չէիք»:
Մարզպետն էլ պատասխանեց, թե ինքը գիշեր-ցերեկ ինչ հնարավոր է՝ անում է:
Հռիփսիմե ՋԵԲԵՋՅԱՆ
