«Վլադիմիր Վարդանյանը, Արթուր Հովհաննիսյանը հիմնավորեցին մեր ասածը, ասում են՝ հիմա Ադրբեջանն էլ է համաձայն Ալմա Աթային: Այսինքն, դուք եւ Ադրբեջանը նույն գիծն եք տանում, շնորհակալություն, այդ պարզաբանման համար: Սոնա Ղազարյանն ասում է, թե մաս-մաս չենք տալիս: Իհարկե, տվել եք մաս մաս, փոքր մաս, Ջերմուկում: Էդքան լավն եք, բա էդ պիլոտային սահմանազատումն ու սահմանագծումը Ջերմուկից սկսեք, Ներքին Հանդից սկսեք, Վարդենիսից, Շորժայից, Իշխանասարից սկսեք: Չեք սկսում: Սեւ լճից սկսեք գոնե: Էդ էլ չեք սկսում, գիտե՞ք ինչի, որովհետեւ չեն թողնում թուրքերը: Թուրքերը ձեզ պարտադրում են էդ կապիտուլյացիան»,- այսօր ԱԺ նիստում իր ելույթում ասաց «Հայաստան» խմբակցության պատգամավոր Արթուր Խաչատրյանը:
Նա նշեց, որ բանականությունն ասում է, որ եթե սահմանազատում են անում, պետք է հայելային անեն՝ ով որտեղ խնդիր ունի, այդ հատվածներից սկսեն. «Վախում եք թուրքերի մոտ ծպտաք, դե արե՛ք: Սյունը տարեք Ջերմուկում խփեք, բա ինչի՞ չեք անում, չեն թողնում չէ՞ թուրքերը: Բա եթե չեք ուզում սյուները, եկեք միասին գնանք, շպրտենք»:
Տեղից ՔՊ խմբակցության պատգամավոր Վլադիմիր Վարդանյանը սկսեց վիճել: Արթուր Խաչատրյանն ասաց. «Պարո՛ն Վարդանյան, սահմանազատման եւ սահմանագծման գործընթացը պետք է խաղաղ պայմաններում լինի, առանց ուժի սպառնալիքի, ինչը մենք տեսնում ենք: Եկեք տղամարդավարի խոստովանենք, որ ձեզ պարտադրում են էդ գիծը եւ ձեզ թույլ չեն տալիս եւս մի ձող վերցնել ու գնալ Սեւ լճում խփել»:
Հռիփսիմե ՋԵԲԵՋՅԱՆ
