ՀՀ տարածքային կառավարման և ենթակառուցվածքների նախարար Դավիթ Խուդաթյանը կառավարության այսօրվա նիստից հետո անդրադարձավ Գյումրիում ստեղծված իրավիճակին։
Նրա խոսքով՝ Գյումրիի ավագանին ցրվել է, որովհետեւ ավելի քան երեք ամիս նիստեր չեն գումարվել։
Հարցին, թե նախքան նոր ավագանու ընտրությունները, ինչպե՞ս է կառավարվելու համայնքը, Խուդաթյանը պատասխանեց․ «Կա նման կառավարման մոդել: Նախ՝ նոր տարվա փոփոխությունից հետո բյուջեն կարող է ծախսվել այն համամասնությամբ, ինչով հաստատված է եղել նախորդ տարվա համար։ Եվ ընտրությունն էլ բավական արագ է կազմակերպվելու, ընտրական հնարավոր առաջին օրը, որը սահմանել է ԿԸՀ-ն։ Վստահ եմ՝ այդ ընթացքում կառավարման խնդիրներ չեն լինի։ Առնվազն այն համամասնությամբ բյուջեի մասով աշխատանքները կշարունակվեն, որով հաստատված է եղել 2024 թվականի համար, իսկ դա կարծում եմ՝ բավական լավ համամասնություն է»։
Հարցին, թե ինչո՞վ էր պայմանավորված Շիրակի մարզպետի պաշտոնանկությունը, նա պատասխանեց․ «Հարցը մի քանի շերտեր ունի, որոնց եւ մարզպետը, եւ վարչապետն անդրադարձել են»։
Կարդացեք նաև
Խուդաթյանն ասաց, որ չի ուզում զուգահեռներ տանել Գյումրիի եւ Վանաձորի իրավիճակների միջեւ, որովհետեւ Գյումրում այլ իրավիճակ է՝ փաստացի համայնքի կառավարում չի իրականացվել այս բաց թողնված ամիսների ընթացքում։
Խուդաթյանը հավելեց․ «Փրայմերիզը Գյումրիում հաջողվել է, եւ չի բացառվում, որ այդ մոդելը Քաղաքացիական պայմանագիր կուսակցությունը համայնքների զգալի մասում համարի կիրառելի»։
Հարցին՝ արդյո՞ք Գյումրիի նախնական ընտրությունները ցույց տվեցին, որ ՔՊ-ն ցածր վարկանիշ ունի, ՏԿԵ նախարարը պատասխանեց․ «Ոչ, բացառում եմ, որ ՔՊ-ն Գյումրիում ցածր վարկանիշ ունի, որովհետեւ 2021 թվականի ընտրություններն առնվազն խոսում են բարձր վարկանիշի մասին»։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
