Արցախցիների իրավունքների պաշտպանության խորհրդի անդամներն Ազատության հրապարակում տեղադրված վրանում հանդիպում են անցկացնում «ՀայաՔվե» նախաձեռնության անդամների հետ։
Նախաձեռնության համակարգող Ավետիք Չալաբյանն ասաց, որ հետագա պայքարի շրջանակներում չպետք է նահանջ լինի արցախցիների վերադարձի իրավունքի հարցից։ «Գործող վարչակարգի ղեկավարն այսօր հայտարարեց, որ Արցախի հակամարտությունը հաղթահարված է, ուստի Մինսկի խումբը պետք է լուծարել։ Եվ դա շատ տարօրինակ հայտարարություն է այն իմաստով, որ հակամարտությունը որեւէ կերպ հաղթահարված չէ, որովհետեւ՝ պարզ չէ, թե այդ հակամարտության լուծումը որն է։ Լավ կլիներ, ինքն ասեր, թե լուծումը որն է։
Եթե Արցախի օկուպացիան եւ արցախցիների տեղահանումը, ունեզրկումը, իրավազրկումը լուծում է համարվում, ապա ես ուզում եմ հայտարարել, որ մենք՝ որպես ՀՀ քաղաքացիներ, դա բնավ չենք համարում լուծում կամ հակամարտության ավարտ։ Ընդհակառակը, հակամարտությունը սկսվել է հենց այն պատճառով, որ խորհրդային Ադրբեջանում կային արցախահայերի իրավունքների խախտումներ, եւ ի վերջո դա բերեց հակամարտության։ Հիմա այդ իրավունքները խախտումները ոչ միայն վերացված չեն, այլ հակառակը՝ ամենածայրահեղ ցեղասպան բնույթ են կրել։ Շատ կարեւոր է, որ դուք այդ ձեր իրավունքին տեր լինեք, եւ մենք էլ բոլոր հնարավոր միջոցներով աջակցելու ենք ձեզ»,- ասաց նա։
Չալաբյանն ասաց, որ չի կարելի խաղաղության փաստաթուղթ կնքել այն դեպքում, երբ հումանիտար խնդիրները չեն լուծվել։ «Առնվազն 23 անձ հիմա պաշտոնապես որպես պատանդ են պահված Բաքվում։ Եվ տարբեր տվյալներով՝ եւս 80 մարդ թեեւ անհետ կորած են համարվում, բայց ամենայն հավանականությամբ՝ գտնվում են գերության մեջ։ Դա կարեւոր խնդիր է, որը եւս պետք է լուծվի»,- հավելեց նա։
Կարդացեք նաև
Չալաբյանի խոսքով՝ կարեւոր է, որ լուծվեն արցախցիների սոցիալական խնդիրները, ինչպես նաեւ կարեւոր է, որ արցախցիներն ապրեն կոմպակտ, եւ իրենց համայնքները չխարխլվեն։ Ուստի, բնակարանային ծրագիրը պետք է ավելի իրատեսական դարձվի եւ համապատասխանեցվի առկա շուկայական իրավիճակին՝ թիրախում ունենալով այն, որ արցախցիները կարողանան կոմպակտ համայնքով ապրել որոշակի բնակավայրերում՝ պահպանելով իրենց համայնքային կյանքն ու ինքնությունը։
Անդրադառնալով արցախցիների քաղաքացիության հարցին՝ Ավետիք Չալաբյանն ասաց․ «Արցախցիները միաժամանակ կարող են լինել եւ Արցախի Հանրապետության քաղաքացի, եւ ՀՀ քաղաքացի։ ՀՀ օրենսդրությունում երկքաղաքացիությունն արգելված չէ, բազմաթիվ անձինք ունեն եւ ՀՀ, եւ այլ երկրների քաղաքացիություն։ Եվ այն, որ արցախցիները 2023 թվականին Հայաստան գալուց հետո անսպասելի կերպով ապօրինի զրկվեցին քաղաքացիությունից, դա ոչ միայն դատապարտելի է, այլ նաեւ բոլոր հնարավոր միջոցներով հիմա պետք է այդ հարցը լուծվի։ Եվ արցախահայերի՝ ՀՀ քաղաքացիության իրավունքը պետք է վերականգնվի։ Մենք այդ ուղղությամբ որոշակի քայլեր սկսել ենք իրականացնել, եթե դուք էլ հետամուտ լինեք, պատրաստ ենք համագործակցել»։
Ռոզա ՀՈՎՀԱՆՆԻՍՅԱՆ
