«Ստիպված եմ արձանագրել մի բան, որը հանրահայտ փաստ է, մյուս կողմից համապատասխան պաշտոնյաները մեզ տևական ժամանակ համառորեն չեն ուզել ասել, երևի, որ տրամադրություններս չկընկնի։ Այդ փաստը հետևյալն է, որ ՀՀ-ն երբեք չի ճանաչել ԼՂՀ-ն»,- հարցին՝ ի՞նչ կարծիք ունեք իշխանության հասցեին հնչող այն մեղադրանքների մասին, որ իշխանություններն օգտագործում են ԼՂ լուծարման հայտնի փաստաթուղթը քողարկելու համար Պրահայում 2022-ին ԼՂ-ն Ադրբեջանի մաս ճանաչելու փաստը, խորհրդարանում կառավարության հետ հարցուպատասխանի ժամանակ այսպես պատասխանեց ՀՀ ԱԳ նախարար Արարատ Միրզոյանը։
Արարատ Միրզոյանը հայտարարեց՝ գրեթե միաժամանակ ԽՍՀՄ կազմալուծմանը Ալմաթայի հռչակագրի ստորագրմամբ ՀՀ-ն ճանաչել է Ադրբեջանի տարածքային ամբողջականությունը ԽՍՀՄ փլուզման պահին եղած սահմաններով․ «Ավելին, փոխադարձ միմյանց տարածքային ամբողջականությունը ճանաչելու՝ այս շատ հիմնարար սկզբունքը հստակորեն արտահայտված է եղել ԼՂ հակամարտության բանակցային գործընթացի բոլոր փուլերում՝ հենց ամենասկզբից և արտահայտված է բոլոր նշանակալի փաստաթղթերում՝ այդ թվում և այսօր քննարկվող մադրիդյան սկզբունքներում։
Մադրիդյան սկզբունքներից մեկը հենց տարածքային ամբողջականությունն է, մյուսը՝ ինքնորոշման իրավունքը։ Նրանց, որոնք դեռ կասկածում են այս երկու երևույթների կապակցվածության մեջ, խորհուրդ կտամ Հելսինկյան եզրափակիչ ակտի 8-րդ կետը կարդան։ Այս գլխի ներքո հստակորեն ասվում է, որ մասնակից կողմերը պարտավորվում են հարգել ժողովուրդների իրավահավասարությունը և ինքնորոշման իրավունքները՝ մշտապես գործելով ըստ ՄԱԿ-ի կանոնադրության նպատակների և սկզբունքների ու միջազգային իրավական նորմերի՝ այդ թվում և տարածքային ամբողջականությանը վերաբերող նորմերին համահունչ։ Այս նույն հիմնարար սկզբունքը Ալմաթայի հռչակագրին համահունչ արտահայտված է նաև ավելի ուշ շրջանի բանակցային փաստաթղթերում։ Այս նույն սկզբունքը արտահայտված է նաև Ադրբեջանի ու ՀՀ-ի միջև խաղաղության պայմանագրի համաձայնեցված տեքստում»։
Կարդացեք նաև
Տաթև ՀԱՐՈՒԹՅՈՒՆՅԱՆ
