«Այն անգործությունը, որը դրսևորում է դատախազությունը քաղաքական նրբերանգ պարունակող գործերում, այդ անգործությունը փաստում է այն բանի մասին, որ Դուք շարունակում եք մնալ քաղաքական իշխանության ենթակա անձ, սպասարկել օրվա քաղաքական իշխանության իրավունքները, դրանց պաշտպանությունը, բայց ոչ երբեք մարդու իրավունքը»,-խորհրդարանում Աննա Վարդապետյանի՝ դատախազության 2024 թվականի հաշվետվության ներկայացման ժամանակ այսպիսի մտահոգություն հայտնեց «Հայաստան» խմբակցության պատգամավոր Արծվիկ Մինասյանը։
Ըստ պատգամավորի՝ այն լիազորությունը, որը տրված է դատախազությանը, իրացվում է բացառապես իշխանության ներկայացուցիչների իրավունքների խախտման պաշտպանության մասով, ոչ ՀՀ քաղաքացիների, ոչ հայերի իրավունքների պաշտպանության մասով։ Երբ Արծվիկ Մինասյանն օգտագործեց հայերի բառը, ՔՊ-ական պատգամավորները հարցրին՝ հայերի՞, նա պատասխանեց․ «Այո, հայերի։ Ինչի՞ է ձեզ տենց մտահոգում։ Լսեք, ես երբ բառն ասում եմ, դրա հետևից կա կոնկրետ հիմնավորում։ Արցախցին ձեզ համար հա՞յ է, թե՝ ոչ։ Արցախցու իրավունքը չի պաշտպանվում, ոտնահարվում է օրը ցերեկով, ատելության ու անհանդուրժողականության բացահայտ դրսևորումները չեն ենթարկվում պատասխանատվության։ Այս ամբիոնից նաև անհանդուրժողականություն է սերմանվում արցախցիների նկատմամբ։ Այս ամենը փաստում է, որ այսօր իրավապահ համակարգը ի վիճակի չէ հայերի իրավունքները պաշտպանելու։ Երբ հարց է հնչում Բաքվում ապօրինաբար պահվող հայերի նկատմամբ իրականացվող կեղծ գործընթացի մասնակցության՝ միջազգային հանցագործության մասին, դրա պատասխանը ոչ թե փակ վիճակն է, այլ միջազգային դատական ատյաններում իրականացվող կոնկրետ գործողությունները։ Դրանք կլինեին լավագույն պատասխանը»։
Անդրադառնալով երեկ խորհրդարանում կատարվածին՝ Արծվիկ Մինասյանն ասաց․ «Ձեզ ասում ենք՝ երեկ է տեղի ունեցել, այստեղից հնչում է անհանդուրժողականություն, թշնամություն ատելություն, բռնության քարոզ, ուղղակի սպառնալիք՝ պայմանավորված քաղաքական հայացքներով, Դուք ասում եք՝ ես չեմ տալիս իրավական գնահատական։ Բա դուք ինչի՞ համար եք։ Բա Սահմանադրությամբ նախատեսված լիազորությունն ի՞նչ է։ Ձեզնից հատուկ էլ ճշտում եմ՝ քաղաքական գնահատականի մասին չէ խոսքը, իրավական նախնական գոնե գնահատական տվեք։ Գոնե այստեղից կարող էիք բռնության, անհանդուրժողականության քարոզը դատապարտել։ Դա էլ չեք անում։ Քաղաքական մեծամասնության ներկայացուցիչներից որևէ մեկից ես այսօր չեմ լսել, որ երեկվա դեպքի կապակցությամբ գնահատական հնչի։ Հակառակն եմ լսել։ ԱԺ նախագահը ոչ միայն չի դատապարտում, այլև երեկ դուրս շպրտելու սպառնալիք հնչեցրեց»։
Կարդացեք նաև
Տաթև ՀԱՐՈՒԹՅՈՒՆՅԱՆ
