Քիչ առաջ Շիրակի մարզի ընդհանուր իրավասության դատարանը որոշեց մեկամսյա կալանքի ենթարկել գյումրեցի լրագրող Լիլիթ Աղեկյանին։ Այս մասին ֆեյսբուքյան ուղիղ եթերում հայտնեց Զարուհի Փոստանջյանը, որը նրա շահերն է ներկայացնում, սակայն երեկվանից նրան չեն թույլատրում ներգրավվել որպես փաստաբան՝ պատճառաբանելով, թե վկա է եղել այն գործով, որով մեղադրանք է առաջադրվել Լիլիթ Աղեկյանին։
Զարուհի Փոստանջյանն ասաց․ «Փաստաբանը, որին կանչել էր քննիչը և որը ապօրինի էր մասնակցում դատավարությանը, նոր ինձ զանգահարեց և շատ մեծ ուրախությամբ տեղեկացրեց, որ Լիլիթ Աղեկյանին մեկ ամսով կալանք են տվել։
Պատկերացնո՞ւմ եք, և այն անձը, որը ներգրավվել է որպես հանրային պաշտպան, այս անձը մասնակցել և օրինականացրել է այս ապօրինությունը։ Հանրային պաշտպանի գրասենյակին եմ ես կոչ անում՝ հետաքննել այս անձի գործունեությունը, ի՞նչ հիմունքներով է նա ներգրավվել այս գործընթացի մեջ, որի իրավունքը չուներ, որովհետև Լիլիթ Աղեկյանը նրանից հրաժարվել է, դատարանի առջև է նրանից հրաժարվել, բայց այս մարդը եկել, մասնակցել է, որպեսզի օրինականացնի դատախազ Չիչոյանի և քննիչի այս ապօրինությունները»,-ասաց Զարուհի Փոստանջյանը։
Նա նաև նշեց, որ Լիլիթ Աղեկյանին փաստացի զրկեցին պաշտպանվելու իրավունքից, խոշտանգումներից զերծ մնալուց։
Կարդացեք նաև
Ըստ փաստաբանի, այս ամենը արվում է այն պատճառով, որ Լիլիթ Աղեկյանին զրկեն կոռուպցիայի դեմ պայքարելու հնարավորությունից։
Ըստ Զարուհի Փոստանջյանի, նա հայտարարել է՝ ուրախ է, որ ՔՊ-ն մաքրվել է Գյումրիից։
«ՔՊ-ի դեմ պայքարը չեն ներում», -ասաց Զարուհի Փոստանջյանը։
Նա կոչ արեց Գյումրու ավագանու ընդդիմադիր խմբակցություններին գալ և պայքարել Լիլիթ Աղեկյանի իրավունքների համար։
Ավելի վաղ Զարուհի Փոստանջյանը մեր հետ զրույցում ասել էր, թե իրեն հստակ հայտնի չէ՝ ինչ քրեական վարույթի շրջանակում են ուզում կալանավորել Լիլիթ Աղեկյանին։
Նրան միայն բանավոր տեղեկություն էին փոխանցել, որ նա մեղադրվում է խուլիգանության և դատարանին վիրավորելու մեջ։
Նունե ԱՐԵՎՇԱՏՅԱՆ
