2025թ․-ի հունվարին իրավունքների պաշտպանության համար ՀՔԱՎ գրասենյակ էր դիմել Լոռու մարզի բնակիչ Վ․Մ․-ն, ում ՀՀ ՆԳՆ ոստիկանության Լոռու մարզային վարչության աշխատակիցները բաժնում ենթարկել էին ֆիզիկական բռնության՝ ինքնախոստովանություն կորզելու նպատակով։ Ոստիկանության աշխատակիցները, չհասնելով իրենց նպատակին, առանց որևէ իրավական հիմնավորման հաջորդ օրը Վ․Մ․-ին ազատ էին արձակել։
ՀՔԱՎ-ի իրավաբանական բաժնի համակարգող, փաստաբան Անի Չատինյանը ստանձնել է Վ․Մ․-ի իրավունքների պաշտպանությունը։ 2025թ․ հունվարի 15-ին Ա․Չատինյանը ՀՀ Լոռու մարզի առաջին ատյանի ընդհանուր իրավասության դատարան բողոք էր ներկայացրել՝ ոչիրավաչափ ճանաչելու Վ․Մ․-ի ձերբակալության մասին որոշումը, որը հունվարի 24-ին բավարարվել էր։
Հունվարի 10-ին ոստիկանության աշխատակիցների կողմից խոշտանգումների ենթարկվելուց ի վեր՝ արդեն տուժողի կարգավիճակում Վ․Մ․-ն ընդամենը մեկ անգամ է հարցաքննվել, և վարույթն իրականացնող քննիչը վերջինիս ծանոթացրել է դատաբժշկական փորձաքննության եզրակացության հետ։ Համաձայն չլինելով եզրակացությանը՝ Վ․Մ․-ի ներկայացուցիչ, Կազմակերպության փաստաբան Սամսոն Գալստյանի կողմից ներկայացվել է կրկնակի դատաբժշկական փորձաքննություն նշանակելու մասին միջնորդություն, սակայն մինչ օրս ո՛չ տուժողը, ո՛չ էլ ներկայացուցիչը փորձաքննություն նշանակելու մասին միջնորդության վերաբերյալ որոշում չեն ստացել։
Դեպքից 5 ամիս անց դեռևս չեն իրականացվել անհետաձգելի և կարևոր քննչական ու դատավարական գործողություններ, մասնավորապես առերես հարցաքննություններ և անհրաժեշտ փորձաքննություններ։
Կարդացեք նաև
Այսպիսով արձանագրում ենք, որ այս գործի շրջանակներում արդեն խախտված են գործի քննության ողջամիտ ժամկետները և անտեսվում է Մարդու իրավունքների եվրոպական դատարանի նախադեպային իրավունքը։
Հելսինկյան քաղաքացիական ասամբլեայի Վանաձորի գրասենյակ
