Կառավարությունն այսօրվա նիստում որոշում ընդունեց, ըստ որի՝ գյուղատնտեսական տեխնիկայի լիզինգի աջակցության ծրագիրն ընդլայնվում է։
Էկոնոմիկայի նախարար Գեւորգ Պապոյանն ասաց․ «Նախագծով առաջարկում ենք փոփոխություն կատարել կառավարության որոշման մեջ, ըստ որի՝ մենք կրկնապատկում ենք հնարավորությունը մեր տնտեսվարողների ու ֆերմերների համար, որպեսզի նրանք օգտվեն գյուղատնտեսական տեխնիկայի լիզինգի աջակցության ծրագրից։ Ներկայումս մեկ ֆերմերը կարող է մինչեւ 250 մլն դրամի գյուղատնտեսական սարքավորում ձեռք բերել։ Եվ մենք ունենք բազմաթիվ ֆերմերներ, հատկապես ֆերմերային տնտեսություններ, որոնք վաղուց հատել են այդ շեմը եւ չեն կարողանում մատչելի պայմաններով ձեռք բերել գյուղտեխնիկա, ինչը խոչընդոտում է նրանց հետագա տնտեսական զարգացմանը։ Այս առումով մենք 250 մլն դրամի շեմը բարձրացնում ենք մինչեւ 250 մլն դրամ, որը կօգնի, որ տնտեսվարողներն ավելի շատ գյուղտեխնիկա կարողանան մատչելի գնով ձեռք բերել։
Մեր քաղաքական մոտեցումն այն է, որ մենք ինստիտուցիոնալ գյուղատնտեսությամբ զբաղվող, արդյունավետ տնտեսավարում իրականացնող գյուղացիական տնտեսություններին պետք է շարունակաբար աջակցենք, որովհետեւ իրականությունն այն է, որ նրանց գյուղատնտեսական արտադրանքն է իրապես մրցունակ ու արտահանելի։ Մնացած դեպքերում մենք տեսնում ենք բազմաթիվ խնդիրներ։ Մյուս կողմից, սա շատ լավ հնարավորություն է մեր գյուղացիներին, տնտեսվարողներին ցույց տալու, որ սա կարող է նաեւ լավ բիզնես հնարավորություն լինել»։
Մանրամասները՝ տեսանյութում
Կարդացեք նաև
Պապոյանն ասաց, որ այսօր Հայաստանում կա 2854 լիզինգառու, որոնց տրամադրվել է 4333 միավոր գյուղատնտեսական տեխնիկա։ «Այս պահին 23 մլրդ դրամի գյուղտեխնիկա է ձեռք բերվել այս ծրագրի շրջանակներում, լիզինգի գումարը կազմել է 12 մլրդ դրամ, սուբսիդավորված գումարը՝ 3,6 մլրդ դրամ»,- հավելեց Պապոյանը։
Ռոզա ՀՈՎՀԱՆՆԻՍՅԱՆ
