«Կոնյակի սպիրտ արտահանող որոշ ավտոմեքենաներ բաց են թողնվել, բայց ցավոք սրտի, պետք է արձանագրենք, որ խնդիրը լուծված չէ, որովհետեւ խնդրի լուծում նշանակում է ինստիտուցիոնալ հասկանանք, թե ինչն է պատճառը»,- կառավարության այսօրվա նիստից հետո լրագրողներին ասաց էկոնոմիկայի նախարար Գեւորգ Պապոյանը՝ անդրադառնալով Վրաստանի տարածքում հայկական կոնյակի արտահանման խնդիրներին։
Նա հավելեց․ «Անկեղծ պետք է լինեմ՝ պատճառները մեզ համար անհասկանալի են։ Եվ փորձում ենք բոլոր մակարդակներում խնդրին լուծում գտնել։ Ուզում եմ նշել, որ առաջիկա օրերին ունենք նախնական պայմանավորվածություն, թերեւս այս անգամ ես կայցելեմ Վրաստանի Հանրապետություն՝ եւս մեկ անգամ հարցերն արդեն տեղում լուծելու ու հասկանալու համար»։
Մանրամասները՝ տեսանյութում
Կարդացեք նաև
Գեւորգ Պապոյանն անդրադարձավ նաեւ կարկուտի հասցրած վնասներին, ասաց, որ մասնավորապես Արարատի, Արմավիրի, Արագածոտնի մարզերում մեծ վնաս է հասցվել գյուղատնտեսությանը։ «Շաբաթ օրը ես կլինեմ Արագածոտնի մարզում, հիմա մեր աշխատանքային խմբերը մարզպետարանների, համայնքների, նախարարության հետ ակտիվ աշխատանքի մեջ են վնասների գույքագրման համար, որից հետո արդեն համապատասխան որոշումներ կընդունվեն։ Կհասկանանք՝ ինչպես կարող ենք աջակցել մեր քաղաքացիներին, որպեսզի մեր գյուղատնտեսության կայուն զարգացման տեմպը չվնասենք։ Հաշվարկներ արդեն կան, բայց գյուղ կա, որ երեկ է եկել կարկուտը, ցավոք սրտի, դա բնական աղետ է, որը դինամիկայի մեջ է»,- ասաց նա։ Պապոյանը նշեց, որ հակակարկտային կայաններն աշխատում են, բայց կան ամպեր, որոնց նկատմամբ այդ թնդանոթային համակարգերի արդյունավետությունը 100 տոկոս չէ։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
