Հավաքական անվտանգության պայմանագրի կազմակերպությունը (ՀԱՊԿ) ակնկալում է, որ Հայաստանի և Ադրբեջանի միջև խաղաղության պայմանագիրը կստորագրվի հնարավորինս շուտ։ Այս մասին, ինչպես հայտնում է ՏԱՍՍ-ը, Ղրղզստանի մայրաքաղաք Բիշքեկում տեղի ունեցող ՀԱՊԿ Խորհրդարանական վեհաժողովի խորհրդի նիստում հայտարարել է ՀԱՊԿ գլխավոր քարտուղար Իմանգալի Տասմագամբետովը։
«Կովկասում որոշակի դրական զարգացումներ կան։ Սա Հայաստանի Հանրապետության և Ադրբեջանի Հանրապետության հայտարարությունն է բանակցությունների ավարտի և երկու երկրների միջև միջպետական փաստաթղթի տեքստի համաձայնեցման վերաբերյալ», – ՀԱՊԿ ԽՎ խորհրդի նիստում ասել է Տասմագամբետովը։
«Մենք հույս ենք հայտնում փաստաթղթի հնարավորինս շուտ ստորագրման վերաբերյալ և ակնկալում, որ դրա իրականացումը ճանապարհ կհարթի Հարավային Կովկասում խաղաղության և կայունության համար»։
ՀԱՊԿ ԽՎ խորհուրդը նախագահում է ՌԴ Պետդումայի նախագահ Վյաչեսլավ Վոլոդինը, որը նաև գլխավորում է ՀԱՊԿ ԽՎ-ն:
Կարդացեք նաև
ՀԱՊԿ Խորհրդարանական վեհաժողովի խորհրդի նիստում Տասմագամբետովն անդրադարձել է նաև Ռուսաստան-ԱՄՆ երկխոսությանը՝ հույս հայտնելով, որ դա կնպաստի լարվածության նվազեցմանը նաև ՀԱՊԿ-ի պատասխանատվության գոտում:
«Ռուսաստանի և Ամերիկայի Միացյալ Նահանգների միջև կա քաղաքական և դիվանագիտական երկխոսություն, որը զգուշավոր լավատեսության տեղիք է տալիս», – ասել է Իմանգալի Տասմագամբետովը:
Տասմագամբետովի խոսքով՝ ռուս և ամերիկացի ներկայացուցիչների միջև շփումների փաստը կարևոր է «աշխարհում ռազմաքաղաքական իրավիճակի կարգավորման» տեսանկյունից։
Նա վստահություն է հայտնել, որ Մոսկվայի և Վաշինգտոնի միջև երկխոսության ազդեցությունը «ամենաուղղակի ազդեցությունն կունենա համաշխարհային գործընթացների վրա և կնպաստի լարվածության նվազեցմանը Եվրասիայի տարբեր տարածաշրջաններում, այդ թվում՝ ՀԱՊԿ-ի պատասխանատվության գոտում»։
