Մխչյան գյուղի դպրոցի բարձր դասարանի աշակերտների կողմից բռնի ուժով տարրական դասարանում սովորող երկու աշակերտին թմրամիջոց տալն ու դրանից կախվածության մեջ գցելու դեպքով չի եղել ահազանգ տուժող կողմից:
«Մխչյանի դեպքով քրեական ոստիկանության և համայնքային ոստիկանության համատեղ աշխատանքի արդյունքում ի հայտ է եկել այս տեղեկատվությունը, ինչի արդյունքում անձինք հրավիրվել են ոստիկանություն։ Այսինքն, ենթադրյալ բռնության ենթարկված կողմը և ենթադրյալ կատարած կողմը ոստիկանության բաժին չեն ներկայացել սեփական նախաձեռնությամբ, չեն դիմել, դիմումով կամ ահազանգով չի ստացվել տեղեկությունը»,- այսօր «Արմենպրես» լրատվական գործակալությունում ասուլիսի ժամանակ ասաց ՆԳՆ համայնքային ոստիկանության գլխավոր վարչության մասնագիտական մեթոդական աջակցության վարչության պետ Էդգար Պետրոսյանը՝ շեշտելով, որ դեռ պետք է պարզել՝ եղե՞լ է բռնություն, թմրամիջոց կամ շորթում:
Հովհաննես Համբարյան
ՀՀ քննչական կոմիտեի մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչության պետ Հովհաննես Համբարյանն էլ ներկայացրեց դեպքի ժամանակագրությունը. «2025 թվականի մայիսի 12-ին ստացվել է հաղորդում այն մասին, որ Մխչյան գյուղի դպրոցում 4-րդ դասարանի և ավագ դպրոցի մի քանի երեխաների միջև տեղի է ունեցել միջադեպ, որի ժամանակ երեխաների քթանցքներին քսել են սպիտակ փոշենման զանգված և այդ տեղեկությունը չհրապարակելու դիմաց պահանջել գումարներ։ Ուզում եմ շեշտել, որ տեղեկություններ են տարածվել, թե երեխաների մոտ առաջացել է կախվածություն և սկսել են գումարներ գողանալ՝ նոր խմբաքանակ ձեռք բերելու համար, քրեական վարույթում նման տվյալներ առկա չեն»:
Այս դեպքով, չորս անձ է ներգրավված որպես կասկածյալ, չկա նրանցից որեւէ մեկի նկատմամբ առաջադրված մեղադրանք:
Կարդացեք նաև
Արփինե ՍԻՄՈՆՅԱՆ
