Ռեջեփ Թայիփ Էրդողանը, որը ղեկավարում է Թուրքիան 22 տարի՝ սկզբում որպես վարչապետ՝ 2003 թվականից, ապա՝ որպես ընտրված նախագահ՝ 2014 թվականից, հայտարարել է, որ մտադիր չէ կրկին առաջադրվել նախագահի պաշտոնում՝ ընդգծելով նաև, որ երկրին անհրաժեշտ է նոր սահմանադրություն։ Այս մասին հայտնում է ՏԱՍՍ-ը:
«Ես չունեմ վերընտրվելու կամ կրկին նախագահի պաշտոնում առաջադրվելու մտադրություն։ Մենք միայն մտածում ենք մեր երկրի հեղինակության բարձրացման մասին։
Թուրքիան փոխվում է, աշխարհը փոխվում է։ Մենք ապրում ենք նոր դարաշրջանում։ Կարծում եք՝ այդքան արագ փոփոխվող աշխարհում կարո՞ղ ենք ինչ-որ բանի հասնել հին Թուրքիայում պետական հեղաշրջման ժամանակ ստեղծված սահմանադրությամբ, որը դեռևս պահպանում է հեղաշրջման մտածելակերպը։
Թուրքիան այլևս չի կարող առաջ շարժվել հեղաշրջում իրականացրածների կողմից գրված սահմանադրությամբ։
Կարդացեք նաև
Մեզ անհրաժեշտ է քաղաքացիական անձանց կողմից առաջարկված սահմանադրություն, այլ ոչ թե հեղաշրջման դավադիրների», – Էրդողանի խոսքն է մեջբերել «Անադոլու» լրատվական գործակալությունը։
Թուրքիայի առաջնորդը հավելել է, որ իր «Արդարություն և զարգացում» կուսակցությունը մշակում է նոր սահմանադրություն։ Նա նաև կոչ է արել ընդդիմությանը՝ մասնակցել։
«Եկեք հանձնաժողովներ կազմենք և միասին՝ հնարավորինս շուտ, ստեղծենք քաղաքացիական սահմանադրություն՝ մեր ժողովրդին ներկայացնելու համար։ Դա չանելու որևէ պատճառ չկա», – ասել է Էրդողանը։
Թուրքիայի նախագահի խոսքով՝ իշխող կուսակցությունը կարող է արագորեն հանձնաժողովներ ստեղծել նոր հիմնական օրենքի վրա աշխատելու համար։
Վաղաժամկետ ընտրությունների վերաբերյալ ընդդիմության կոչերին անդրադառնալով՝ Էրդողանն ասել է, որ ո՛չ վաղաժամկետ, ո՛չ էլ միջանկյալ խորհրդարանական ընտրությունների «անհրաժեշտություն» չկա։
«Եթե նայենք խորհրդարանում առկա իրավիճակին, այնտեղ միջանկյալ ընտրություններ պահանջող հանգամանքներ չկան։ Երկու տարի առաջ երկիրը իր ներկայացուցիչներին ընտրեց խորհրդարանում՝ հինգ տարի ժամկետով», – հիշեցրել է Թուրքիայի նախագահը։
