«Իրական փաստեր էինք բերել, ցավում եմ, որ հրապարակային քննարկումը դեռ չի եղել, բայց Ազգային ժողովի փորձագիտական գրասենյակը տվել է խիստ բացասական կարծիք այդ նախագծի մասին, հակասահմանադրական է ձեւակերպել։ Երեկ Մարդու իրավունքների պաշտպանն է ստիպված հայտարարություն արել»,- Ազգային ժողովում լրագրողների հետ ճեպազրույցում ասաց «Հայաստան» խմբակցության պատգամավոր Գեղամ Մանուկյանը՝ անդրադառնալով ՔՊ խմբակցության պատգամավոր Հայկ Սարգսյանի հեղինակած «Զինվորական ծառայության եւ զինծառայողի կարգավիճակի մասին» եւ հարակից օրենքներում փոփոխություններ եւ լրացումներ կատարելու նախագծերի փաթեթին։
Նշենք, որ ԱԺ պաշտպանության եւ անվտանգության հարցերի մշտական հանձնաժողովն այսօր հետաձգեց այս փաթեթի քննարկումը, որը «բանակից փողով ազատվելու նախագիծ» անունով է հայտնի։
Նա հիշեցրեց, որ 2018 թվականին ՔՊ-ն օրենքը փոխեց, եւ ներկայումս ԱԳ փոխնախարար Վահան Կոստանյանն այն ժամանակ ընդունվեց ասպիրանտուրա։ Երեք տարի հետո, երբ դիսերտացիայի ժամանակն էր, դիմում գրեց, ասպիրանտուրայից դուրս եկավ։ «Պաշպանության նախարարն այն ժամանակ Արշակ Կարապետյանն էր, հարցնում եմ՝ Վահան Կոստանյանն ինչո՞ւ չի զորակոչվել, պատճառաբանում են առողջական խնդիրներով։ Այսպես են բանակից ազատվում այս իշխանության ներկայացուցիչները եւ փորձում են փողատերերին ազատել, որը թույլ չենք տալու»,- ասաց նա։
Գեղամ Մանուկյանի խոսքով՝ այսպիսի ծայրահեղ լիբերալ իշխանություն, որը ծառայում է միայն բանկային համակարգին, որի գերնպատակը փողն ու տուգանքն է, պարտք վերցնելը, երբեք չի եղել Հայաստանում։
Կարդացեք նաև
Անդրադառնալով իշխանության ներկայացուցիչների հայտարարություններին, թե այս նախագծերի փաթեթի ընդունման դեպքում ներգաղթ կլինի, Գեղամ Մանուկյանն ասաց․ «Երբ մեկ տարի առաջ ինքը բերում էր այդ նախագիծը, եւ 15 մլն դրամ էր, ասում էի՝ լավ, Սփյուռքում, արտասահմանում, Ռուսաստանում ապրող հայերը միլիարդատեր չեն, եւ բազմաթիվ արձագանքներ կան մարդկանցից, որ մենք օրվա հաց ենք վաստակում։ Այսինքն՝ էդ գումարների չափերը, որոնք դնում են, որեւէ ձեւ պատկերացում չունեն։ Կամ իրենց թվում է, որ իրենց շրջապատի գնային սանդղակով կարող են մտածել, որ համալիրներում հարսանիք անեն, բան անեն։ Եթե փողով բանակից ազատվում են, նշանակում է՝ կոռուպցիա կա։ Բա ո՞ւր են լոլոներ կարդում, 7 տարի իշխանության են, այս ամենը թող արմատախիլ անեին, եթե կա։ Այսինքն՝ պետության, իշխանության խնդիրն այդ բացերը լրացնելն է, ոչ թե բացերն օրինականացնելը։ Հակառակ դեպքում եկեք մարդասպանին ասենք՝ 14 մլն կամ 24 մլն վճարիր, մեկ ամիս նստիր»։
Ռոզա ՀՈՎՀԱՆՆԻՍՅԱՆ
Լուսանկարը՝ Գեղամ Մանուկյանի ֆեյսբուքյան էջից
