«ԱԺ-ն է ԿԲ նախագահ ընտրել, նշանակել, և մինչև այսօր ԿԲ նախագահն իբրև թե աշխատում է, որի արդյունքները մենք չենք զգում։ Եթե աշխատում է, հետևաբար այսքան քաղաքացիների թալան չէր լինի»,- Վարկային խարդախությունների զոհ դարձած քաղաքացիների բողոքի ցույցի ժամանակ ԱԺ-ի դիմաց լրագրողների հետ զրույցում ասաց «Հանրային վերահսկողություն» հ/կ ղեկավար Մհեր Կարագյոզյանը։
Նա հայտնեց, որ իրենց դիմել են 307 քաղաքացիներ։ Լրագրողների հարցին՝ իսկ ինչո՞ւ այստեղ չեն այդ քաղաքացիները, նա պատասխանեց՝ այստեղ ներկա են շուրջ 100 քաղաքացիներ և պատճառաբանեց՝ մարդիկ հուսալքված են և ելնելով անվստահությունից՝ չեն դիմում պետական մարմիններին։
Լրագրողների հարցին՝ ինչո՞ւ եք ԱԺ եկել ժամը 17։00-ին, երբ աշխատանքային ժամն ավարտին է մոտենում, Մհեր Կարագյոզյանն այսպես արձագանքեց․ «Միևնույն է՝ ԱԺ-ի ներսում այս պահին ընդհանրապես մարդ կա, թե՝ ոչ։ Եթե մարդիկ լինեին ու զբաղված չլինեին միայն իրար գզվռտվելով ու իրենց պարտականությունները կատարեին, ապա այս հարցն առանց մեր բարձրացնելու կլուծվեր, և ԿԲ նախագահին հեռացրած կլինեին»։
Հարցին՝ ի վերջո այս խնդրի հասցեատերն ո՞վ է՝ միայն ԿԲ-ն, Մհեր Կարագյոզյանը պատասխանեց՝ մենք պահանջում ենք, որ մեզ ընդունեն 107 պատգամավորները՝ բոլորը ու նշեց․ «ԿԲ-ի թերի աշխատանքների պատճառով է, որ բանկերն իրենց թույլ են տալիս ինչ ասես և անհամաչափորեն կողոպուտի են ենթարկում քաղաքացիներին։ Բերեն մի այնպիսի մարդ նշանակեն ԿԲ ղեկավար, որ կարողանա բանկերին բերել ուղղակի օրինական դաշտ։ Բանկերն օրինական դաշտում չեն։ Իրենք խախտում են իրենց պայմանագրերը, ունեն բացթողումներ։ Բանկերը չեն կարողանում ճիշտ աշխատել, քանի որ նրանց չեն ստիպում ճիշտ աշխատել։ Իսկ ո՞վ չի ստիպում՝ ԿԲ նախագահը»։
Կարդացեք նաև
Տաթև ՀԱՐՈՒԹՅՈՒՆՅԱՆ
