Քաղաքագետ Գագիկ Համբարյանն Aravot.am-ի հետ զրույցում ասաց, որ Ադրբեջանում ցնծում են Նիկոլ Փաշինյանի կողմից Հայ Առաքելական Սուրբ Եկեղեցու նկատմամբ վարվող քաղաքականությունից։ Ըստ քաղաքագետի, այն ադրբեջանական գրեթե բոլոր խոշոր կայքերի քննարկման կարևոր թեմաներից է․ չկա օր, որ անդրադարձ չլինի, նրանք իրենց գոհունակությունն են հայտնում Նիկոլ Փաշինյանի վարած հակաեկեղեցական քաղաքականության նկատմամբ ու քննարկում են, թե ինչ օգուտ կարող է ստանալ պաշտոնական Բաքուն այս ամենից։
«Ինձ համար բացարձակ զարմանալի չէ, որ Նիկոլ Փաշինյանը նոր արշավ սկսեց Հայ Առաքելական Սուրբ Եկեղեցու նկատմամբ իրեն Կովկասի մահմեդականների առաջնորդ հռչակած Ալաշյուքյուր Փաշազադեի՝ Հայ Առաքելական Սուրբ Եկեղեցու հասցեին հնչեցրած զառանցանքներից անմիջապես հետո, որտեղ Հայ Առաքելական Սուրբ Եկեղեցուն մեղադրեց տարածաշրջանային վտանգ ներկայացնելու մեջ։ Ի դեպ, նշեմ, որ Ադրբեջանում Հայ Առաքելական Սուրբ Եկեղեցին և նրա սպասավոր բարձր հոգևորական դասն անվանվում են ֆաշիստ գործիչներ, որոնք հակաադրբեջանական դիրքորոշում ունեն։
Նիկոլ Փաշինյանի վարած քաղաքականությունը Հայ Առաքելական Եկեղեցու նկատմամբ ողջունվում է Բաքվում նաև այն կոնտեքստի համաձայն, որ Հայ Առաքելական Սուրբ Եկեղեցին վերջին ինստիտուտն է Հայաստանում, որը պաշտպանում է արցախյան հարցի լինելը, չի լուծարել Արցախի թեմը, որը Ադրբեջանի պահանջներից մեկն է․ և սրանով էլ պայմանավորված են նման հարձակումները։
Նիկոլ Փաշինյանը, որը իրեն հռչակել է Հայ Առաքելական Սուրբ Եկեղեցու հավատարիմ հետևորդ, իրականում այդպես չէ, ինքն աղանդավոր է ու բազմաթիվ ապացույցներ կան դրա վերաբերյալ, գնդակը ստանալով Ադրբեջանից՝ ամեն ինչ անում է գոհացնելու Իլհամ Ալևին ու Ալաշյուքյուր Փաշազադեին»,-ասաց Գագիկ Համբարյանը։
Կարդացեք նաև
Նունե ԱՐԵՎՇԱՏՅԱՆ
