Հունիսի 10-ին Բարձրագույն դատական խորհրդում կլսվի երեք դատավորների՝ ՀՀ վերաքննիչ վարչական դատարանի դատավորներ Հրաչ Այվազյանին, Ռուստամ Մախմուդյանին եւ Կարեն Ավետիսյանին կարգապահական պատասխանատվության ենթարկելու հարցի վերաբերյալ միջնորդության քննությունը:
Կարգապահական վարույթ հարուցելու հիմք է հանդիսացել Առողջապահության եւ աշխատանքի տեսչական մարմնի ղեկավար Սլավիկ Սարգսյանի հաղորդումը, ով այն ուղարկել էր ՀՀ արդարադատության նախարարին: Արդարադատության նախարարի փետրվարի 28-ի թիվ 15-Ա որոշմամբ, դատավորների նկատմամբ հարուցվել է կարգապահական վարույթ: Հետեւել է նախարարի մեկ այլ որոշումը. 35-Ա որոշմամբ որոշվել է դիմել Բարձրագույն դատական խորհուրդ:
Նշեմ, որ միայն մայիսին ԲԴԽ-ն կայացրել է չորս աշխատակարգային որոշում՝ մայիսի 5-ին՝ 1, 19-ին՝ 3, այլ դատավորների կարգապահական վարույթի կապակցությամբ: Մայիսի 5-ին Կոռուպցիայի կանխարգելման հանձնաժողովի միջնորդությունը լսելով՝ Երեւան քաղաքի քրեական դատարանի դատավոր Վահագն Մելիքյանին պատասխանատվության ենթարկելու մասին, որոշել էր մայիսի 19-ին նիստը հրավիրել, մայիսի 19-ին էլ վարչական դատարանի վերոնշյալ դատավորների գործի քննությունը հետաձգել էր, նշանակել հունիսի 2-ին: Նույն մայիսի 19-ի որոշմամբ Երեւան քաղաքի քրեական դատարանի դատավորներ Գագիկ Պողոսյանի եւ Մասիս Մելքոնյանի գործերը կլսվեն դարձյալ հունիսի 9-ին: Թե Գ. Պողոսյանի, թե Մ. Մելքոնյանի միջնորդությունը ներկայացրել է ՀՀ դատավորների ընդհանուր ժողովի էթիկայի եւ կարգապահական հարցերի հանձնաժողովը:
Ռուզան ՄԻՆԱՍՅԱՆ
Կարդացեք նաև
«Առավոտ» օրաթերթ
06.06.2025
