ՀՀ կրթության, գիտության, մշակույթի և սպորտի նախարարության, Ինդոնեզիայում Հայաստանի դեսպանության և «Հովնանյան» բարեգործական հիմնադրամի աջակցությամբ Ինդոնեզիայի նորաձևության շաբաթվա շրջանակում (Indonesia Fashion Week /IFW/) «Տերյան մշակութային կենտրոնը» ներկայացրել է «Մշակութային վերածնունդ» խորագրով հայկական նորաձևության նախագիծը։
Հայաստանը մասնակցել է միջոցառմանը որպես հատուկ հյուր, ինչը բացառիկ հնարավորություն է ընձեռել ներկայացնելու հայկական մշակութային և նորաձևության ինքնատիպությունը միջազգային հարթակում։
IFW 2025-ին մասնակցել են շուրջ 200 դիզայներներ և ոլորտի մասնագետներ աշխարհի տարբեր երկրներից, այդ թվում՝ Իտալիայից, Ֆիլիպիններից, Մալայզիայից, Ղազախստանից, Կոլումբիայից, Պերուից և այլ երկրներից։ Միջոցառման շրջանակում կազմակերպվել են նորաձևության ցուցադրություններ, ցուցահանդեսներ, քննարկումներ և ստեղծագործական ֆորումներ։
Կարդացեք նաև
Հայկական պատվիրակության կազմում հանդես են եկել «Տերյան մշակութային կենտրոնի» ղեկավար, դիզայներ Լիլիթ Մելիքյանը, երիտասարդ դիզայներներ Հայկուհի Կարապետյանը և Անգելինա Քարամյանը:
Նրանք ցուցադրել են հայկական ազգային տարազով և ժամանակակից դիզայնով ստեղծված բացառիկ հավաքածուներ՝ արժևորելով մշակութային ժառանգության ու նորարար մոտեցումների համադրությունը։
Շաբաթվա ընթացքում գործել է նաև հայկական տաղավար, որտեղ ներկայացվել են հայ վարպետների ձեռագործ աշխատանքները՝ արհեստագործական արտադրանք, ազգային ոճով աքսեսուարներ, մոդելային նմուշներ և գեղարվեստական լուծումներ։
Հայաստանի ներկայացուցիչները հանդես են եկել նաև ուսուցողական սեմինարով և վարպետության դասով Ջակարտայի Բատիկայի թանգարանում՝ ներկայացնելով հայկական հագուստի ձևավորման ավանդույթներն ու տեխնիկան։
ՀՀ ԿԳՄՍՆ
