Երևանի քաղաքապետարանի նախաձեռնությամբ երրորդ տարին անընդմեջ տարածաշրջանում իրականացվող «Երևանի բալետային փառատոնը» Թումանյանի անվան զբոսայգում, որն այս տարի մեկնարկեց հունիսի 6-ին, 13-ին կեզրափակվի Երևանի օպերայի և բալետի ազգային ակադեմիական թատրոնը, աշխարհահռչակ Շահար Բինյամինիի խորեոգրաֆիայով Ռավելի «Բոլերո X» և Ստրավինսկիի «Սրբազան գարուն» ներկայացումներով: Մինչ այս, Մոսկվայի «Բոլշոյ» թատրոնը ներկայացրել էր Ադանի «Ժիզելը» և «Գալա բալետ», իսկ Սանկտ Պետերբուրգի «Մարիինյան» թատրոնը «Շոպենիանա», «Շահերազադա» ու «Գալա բալետ» բեմադրությունները:
Շահար Բինյամինի
Վերջին, գլխավոր փորձից հետո զրուցեցինք Շահար Բինյամինիի հետ, որը դժվարությամբ համաձայնեց, հավաստիացնելով, թե իրեն ներկայացնելու անհրաժեշտություն չի տեսնում, փոխարենն իրեն անհրաժեշտ է զգալ հանդիսատեսի գնահատանքը: Մինչ հարցազրույցը ներկայացնելը՝ մենք էլ հավաստիացնենք, որ բալետային թատրոնների, խմբերի, ընկերությունների կողմից սպասված խորեոգրաֆը ժլատ էր իր պատասխաններում:
-Ձեր ստեղծագործող անհատականությունն այսօր համաշխարհային բեմում հանդես է գալիս որպես յուրատեսակ և անկրկնելի, ապրող ու գործող պարային հանրագիտարան, որտեղ օրգանապես զուգակցվում են արտիստը, պարուսույցը, նոր ուղղությունների փորձարկողը, ժամանակակից համաշխարհային պարային կենտրոնների հետ համակարգված աշխատանքներում: Նույնիսկ հիմնել եք TNUDA գիտահետազոտական խումբը, որտեղ միավորվում են պարողները, պարուսույցները և գիտնականները, ուսումնասիրելով գիտության և շարժման միջև կապը, որն իր հերթին պրոֆեսիոնալ ամենաբարձրակարգ մանկավարժական աշխատանք է: Արդյոք դա Ձեր անհատականության դրսևորո՞ւմն է, թե խիստ անհրաժեշտություն է այդ բոլոր գործոնների համադրումը, ինչը բացահայտ է, որ հազվադեպ մարդկանց կարողություն է: Ի վերջո, դա Ձեր ցանկությո՞ւնն է, թե՞ խիստ անհրաժեշտություն:
Կարդացեք նաև
-Այդ ամենի սկզբնաղբյուրը ստեղծագործության հանդեպ ունեցած իմ հետաքրքրությունն է ու նաև երևակայության ուժը:
-Ձեր պաշտոնական էջից տեղեկանում ենք, որ տարբեր երկրներում իրականացված Ձեր բեմադրությունների ոչ միայն թեմատիկան է խիստ բազմազան, այլև բեմադրական ուղղություններն են բազմազան: Կարծես յուրաքանչյուր բեմադրություն նորարարական փորձարկում է: Իսկ Gaga պարային ուղղությունը տիրապետելուց ու տարածելուց հետո` Դուք այդ ամեն ներկայացմամբ, կարծես մի նոր ուղղություն եք ստեղծում: Ի՞նչն է պատճառը, որ Ձեր մոտ այդքան շատ ուղղություններ կան այն դեպքում, երբ շատ բալետմայստերներ իրենց ստեղծագործական կյանքի ընթացքում գործում են միայն մեկ ուղղության սահմաններում:
-Այդ ամենը մեկ նպատակ է հետապնդում, այն է` որ ես կարողանամ ազատ ու անկաշկանդ արտահայտվեմ:
-Դուք լայնորեն կիրառում եք ոչ միայն մարմնական բարձրակարգ պատրաստվածությունը, այլ մեծ տեղ եք տալիս հոգեբանական էքսպրեսիային: Ենթադրում ենք, որ Երևանի բեմում Դուք հանդիպեցիք ոչ միայն բարձրակարգ պրոֆեսիոնալ պարողների, այլ գուցե բացահայտեցիք հարավային ու հայկական ոգու ավյունն ու տաքարյուն տեմպերամենտը:
-Հայերիդ մշակույթը, ջերմությունը, խոհանոցը և այլն, ինձ համար հանդիսացան ոգեշնչման աղբյուր և ես այստեղ` Հայաստանում զգացի ինքս ինձ էլ ավելի մոտ:
Սամվել ԴԱՆԻԵԼՅԱՆ
Հ.Գ. Երևանի օպերայի և բալետի ազգային ակադեմիական թատրոնում «Բոլերո» և «Սրբազան գարուն» բեմադրությունները առաջին անգամ կներկայացվեն հուլիսի 17 –ին և 18-ին, մաեստրո՝ Կարեն Դուրգարյանի ղեկավարությամբ:
Լուսանկարներում` Երևանի օպերային թատրոնում`Շահար Բինյամինիի փորձերից
