«Նշեցիք, որ Հայաստանն աշխարհի համեմատ ավելի արագ է զարգանում, հաճելի է լսել սա, բայց գաղտնիքը ո՞րն է՝ չունենք հզոր արտադրություն, նավթի կամ գազի պաշարներ, բամբակի դաշտեր, ու այսպիսի փաստի առաջ ենք կանգնած․ գաղտնիքը ո՞րն է աշխարհի համեմատ արագ զարգանալու»,-խորհրդարանում դիմելով ՀՀ Ֆինանսների նախարար Վահե Հովհաննիսյանին՝ հարցրեց պատգամավոր Գեղամ Նազարյանը։
Վահե Հովհաննիսյանը պատասխանեց․ «Եթե մենք դասավորենք բոլոր պետություններին՝ ըստ ՀՆԱ-ի, ապա ՀՀ-ն այս ընթացքում 40 կետով առաջ է անցել։ Իմ կարծիքով՝ դրա պատճառն այն է, որ մենք ունենք հսկայական չիրացված պոտենցիալ, որը ժողովրդավարության պայմաններում հնարավոր է դառնում իրացնել։ Դրա համար եմ ասում՝ եթե մենք ճիշտ որոշումներ կայացնենք, այդ պոտենցիալն էլ ավելի կկարողանանք բացահայտել և ՀՀ-ն բերել լրիվ ուրիշ զարգացվածության մակարդակի։ Ունենք տաղանդավոր մարդիկ, որոնց համար լավ պայմաններ պետք է ստեղծել գործելու համար։ Հարկային քաղաքականությունը դրա կարևոր բաղկացուցիչներից մեկն է»։
Կարդացեք նաև
Գեղամ Նազարյանը նաև հետաքրքրվեց՝ Իրանի նկատմամբ իրականացվող այս դատապարտելի ագրեսիայի պայմաններում հաշվարկե՞լ եք, կամ հաշվարկո՞ւմ եք հնարավոր ազդեցությունները ՀՀ-ի տնտեսության վրա: Նախարարը պատասխանեց․ «Ֆինանսների նախարարությունում դեռ սցենարներ չենք մշակել, դեռ անորոշությունները շատ են։ Հենց զգանք՝ ազդեցությունների կոնկրետությունը տեսանելի է, բնականաբար, համապատասխան վերլուծությունները կներկայացնենք կառավարությանը»։
Տաթև ՀԱՐՈՒԹՅՈՒՆՅԱՆ
Լուսանկարը՝ ԱԺ նախագահ Ալեն Սիմոնյանի տելեգրամյան ալիքից
